Michael Binzer: Inuiaqatigiit aningaasakilliornerat paasinuminaatsippat
Timmisartuni inuttat ukiut pingasut qaangiuttut aamma suliumajunnarnissamik siorasaarereersut taamatorpiaq pisoqarpoq, soorlu timmisartuni aquttut isumaqatigiinniarnerit ajutooreerneranni aamma suliumajunnaarsimasut.
Air Greenlandip tassanilu sulisut peqatigiiffiisa sunniuteqarnerit tamanit malinnaaffigineqartumik aaqqiagiinngeqattaarnerannut sulisut inuiaqatigiinni ineriartornermik paasinninnginnerannik timmisartuutileqatigiiffik naapertorlugu nassuiaatissaqarpoq.
- Tamanna suliffeqarnermi pissutsit allanngorsimanerannut ersiutaasoraara. Nunatsinni aningaasat ikinnerulernikuupput. Unalu pisoq akissarsiat ukiuni makkunani qaffapiloornissaannut akissaqannginnermut ersiutaavoq. Ilimagaaralu taamaannera akueriuminaatsinneqartoq, Air Greenlandip pisortaa, Michael Binzer, oqarpoq nangillunilu:
- Aamma ilinniartitsisuni, peqqissaasuni nakorsanilu - tassami sulisuni tamani taama pisoqartoq takuarput. Akissarsiat qaffakkiartupiluunnginnerat paasiuminaatsinneqarpoq, isumaqarpungalu Nunatsini atukkat taamaannerat ukiualunni suli sungiunniarsarissagipput, Michael Binzer oqarpoq.
Taamannalli oqarneq timmisartuni inuttat siulittaasuata Ajaaja Kofoedip akuerinngilaa:
- Inuiaqatigiit aningaasaqarniarnerat qanoq innersoq soorunali nalunngilarput. Isumaqatigiinniarnerup ingerlanerani naapertuutinngitsunik ingasappallaanilluunniit piumasaqanngilagut. Suliffeqarfittami ingerlalluarnissaa uaugullu suliffeqaannarnissarput kissaatigaarput, taavalu suliffitsinnut inuiaqatigiinnulluunniit artukkeerusunnata. Kisianni ilaaasortatta piumasaat naammassiniartussaavagut, taamamallu uteriilluta naammassiniartariaqarlugit, Ajaaja Kofoed oqarpoq.
Piumasaqaatitik sorliit akuersaarneqarsimanersut sorliillu itingartinneqarsimanersut taassuma oqaluttuariumanngilaa. Air Greenlandimili sulisitsisut aarleqqutigaat, tatigeqatigiinneq isumaqatigiinniarnerit kingunerisaannik ajoqusersimasoq iluarsaanneqartariaqassasoq:
- Kimillannerit nipinnertuulerneqartariaqarput, uagullu nammineq tamanna suliariumaarparput. Tassalu nerrivik kaajallallugu issaariarluta qanoq suleqatigiissanerluta oqaloqatigiikkumaarpugut, Binzer oqarpoq.
Suliumajunnaarnissamilli illuaniillu mattussinissamik siorasaarisoqarsimagaluartoq, suliffimmi pisortat sulisullu akornanni tatigeqatigiinneq ajunngitsoq, Ajaaja Kofoed timmisartuni inuttat sinnerlugit isumaqarpoq.
- Suleqatigiinneq ajunngillunnassasoraara. Isumaqatigiinniarnerup nalaa tamaat immitsinnut pissuserissaarpugut. Illua tungeriillu aaqqiinissaq kissaatigisimavaat aamma pisuuteqattaattoqanngilaq. Isumaqatigiinniarnermi piumasarisat assigiinngitsut marluk saqqummiunneqartarput, kisianni suleqatigiinneq ajunngilluinnarpoq, Ajaaja Kofoed oqarpoq.
Isumaqatigiinniarnermi inernerisaq ilaasortami akuersaassagaat taassuma ilimagilluinnarpaa.
