Michael Binzer: Amerlanerusunik sinneqartooruteqarsinnaagaluarpugut
- 25 millionit koruuninik sinneqartooruteqarnissamik ilimagisaqarnerput ajorisassaanngikkaluarpoq. Suliffeqarfilli taama angitigisoq eqqarsaatigissagaanni tamanna naammanngilaq. 40-t aamma 50 millionit koruunit akornanni sinneqartooruteqarnissarput ilimagisinnaasariaqaraluarparput, Michael Binzer oqarpoq.
Ilaasut ikiliartornerat, bilitsillu akikilliartornerat pissutaaqataasut, taassuma oqaatigaa, bilitsit 2001-imili 30 procentinik akikillisimanerarlugit.
Air Greenlandip timmisartorsua Boeing 757, Kununnguaq, tunineqarsimasoq Michael Binzerip aamma saqqummiuppaa, kikkunnulli, qanorlu akilerlugu, tunineqarsimanersoq saqqummiukkusunnagu.
Timmisartorsuarli ilaasunik siunissami timmisartuussisassanngitsoq paasinarsivoq, assartuutinngortinneqassagami.
Boeing 757 Narsarsuup Københavnillu akornanni timmisartuussinermut atorneqartaraluarpoq, maannali tassa tunineqarluni, tamannali isumaqanngilaq Kujataani timmisartuussisarneq ajornerulissasoq, Michael Binzer erseqqissaavoq:
- Kujataani juunimi, juulimi aggustimilu timmisartuussisoqartarnissaa attatissavarput, timmisartorli attartugaq atussallutigu. Timmisartut Dash-8-200-t ukiup sinnerani timmisartuussinermi atortassavavut, Narsarsuup Kangerlussuullu akornanni timmisartuussinermut atussagatsigik. Timmisartut taakku Kangerlussuaq aqqusaartassavaat, Michael Binzer oqarpoq.
Timmisartoq Boeing 757 Kununnguaq pingasunngorpat kingullermik timmisartuussissaaq, tamannalu Narsarsuarmi kaffillertitsinikkut malunnartinniarneqassalluni.
