MIBB: Ikiuerusuttorpassuaqarpoq
Suliniaqatigiiffiup Meeqqat Inuunerissut siulittaasuata, Kathrine Hjelholt Nathanielsenip suliniaqatigiiffiup meeqqat pisinnaatitaaffiisa inerisimasut akornanni ilisimasaqarfigineqarnerulernissaannik ukiuni pingasuni suliniutigisimasaata naammassineqarnerani taama oqarpoq, peqatigisaanillu meeqqat inuusuttullu pillugit nammineq kajumissutsimik suliaqartoqarnerunissaanut kaammattuuteqarluni.
- Ukiut kingulliit pingasut illoqarfiit qulit tikeraarpavut, Kalaallit Nunaannilu meeqqat pitsaanerusumik atugaqalersinniarlugit inutsialappassuit iliuuseqarusulluinnartut amerlaqisut naapissimallutigit. Taqqissuuserisut najukkaminni inuiaqatigiinni eqqortumik iliuuseqarnissamut amerlanerusunik sakkussaqalersinnissaat isumasioqatigiinnermi siunertarivarput, Meeqqat Inuunerissut siulittaasuat Katrine Hjelholt Nathanielsen taama oqarpoq.
Namminneq kajumissutsiminnik suliniuteqartut 50-it illoqarfinnit qulineersut Meeqqat Inuunerissut ukiuni pingasuni suliniutigisaani "Kuseriarnerup Siaruarneratut" kingullertut sammisatut sapaatit akunnerata siuliani isumasioqatigiissinneqarput.
Nuannaarnermik isumallualernermillu pilersitsisarpoq
- Ukiut assorsuaq pissanganartuusimapput – assut unammilligassaqarnarlutik peqatigisaanillu assut isumassarsinarfiullutik. Meeqqat atugaat pillugit sullissineq ilaanneeriarluni suliassarujussuartut isinarsinnaasarpoq, ineriartornerlu kigaappallaartutut misiginarsinnaasarluni. Taqqissuuserisulli issiaqatigitillugit, meeqqanik sullissinissamut isumassarsiaat takorluugaallu tusarnaaraanni, tamanna nuannaarnermik isumallualernermillu kinguneqaannartarpoq.
- Innuttaasut nukittuut tunniusimasullu amerlaqisut akornatsinniipput – taakkualu ikiorsernissaannut Villumfondenip 10 millionit koruuninik tunniussaqarneratigut kalaallillu inuiaqatigiit 2011-mi katersuiniarnermi 1 million koruuninik tunissuteqarnerumikkut periarfissimmatigut assut nuannaarutigaara”, Katrine Hjelholt Nathanielsen naggasiivoq.
