Mianersoqqussut soqutiginngilaat

Inatsisinik unioqqutitsinermik mianersoqqussut, Greenpeacekkormiut soqutiginngilaat.
Allattoq Jaaku Lyberth
aggustip 31-at 2010 06:50

Greenpecekkormiut sisamat Cairn Energyip qilleriviata saneraani qilersuuteqqaneranni, sinerissami nakkutilliissutip Vædderip gummibådia qilleriviup eqqaani piareersimatinneqarpoq.

Greenpeacekkormiut immamut nakkassagaluarpata nakkutilliissummi inuttat piareersimatinneqartut, Michael Hjorth Kangilinnguani sakkutooqarfimmi pisortaq KNR-imut oqarpoq.

- Greenpeacekkormiut gummibådimik qilleriviup tungaanut ingerlasut ullaaq takuagut, oqarfigaagullu inatsisit malillugit killiliussaq 500 meteriusoq qaangeraat, inatsisinillu unioqqutitsinerat erseqqissaassutigalutigu, Michael Hjorth oqarpoq.

Greenpeacekkormiut unioqqutitsinermik oqaluttuunneqaraluarlutik ingerlaannarput, maannakkullu taamaliornerat politiit suliassarileraat, Michael Hjorth oqarpoq.