Innaarsuit Mianersoqqusineq suli atuuttoq
- Kalerriutiginikuuarput suli iluliarsuaq taanna ikkarleqqatillugu taama nunarfimmut qanitsigitillugu meeqqat pitsorluttullu sissamiinnaveersaaqqullugit, pisariuvissumik sissamiinnianngikkaangamik. Aammalu qimmit 10 miiteri sinnerlugu qummut pitoqqanissaat. Taavalu aamma iluliarsuaq taanna qanillattornaveersaarlugu allatulli ulorianarsinnaammata iluliarsuit taama angitigisut. Assakartussannguleraluarpata, politiit tusagassiuutinut oqaaseqartartuat Carl Sværd paasissutissiivoq.
Iluliarsuaq qaammatip matuma siorna Innaarsunni ikkarlittoq, ilanngarterluni ataasinngormat nakkaavoq. Taamaammat innuttaasut suli mianersussasut, politiit ilisimatitsipput.
AAMMA ATUARUK Innaarsunni ulorianartutut nalunaaqutsiineq atorunnaartoq
Mianersoqqussut suli atuuttoq
Nunatta avannaani nunaqarfimmi innuttaasut iluliarujussuaq nunaqarfiup eqqannguani aarlerinartumik inississimasoq takusinnaagaat, juuli qiteqquttoq oqaluttuaraarput.
Oqartussaasut, upalungaarsimasut politiillu pissutsit nakkutigeqqissaarpaat. Innaarsummiut arlallit iluliarsuup qanittuani najugaqartut aserussappallu eqqugaaratarsinnaasut nunaqarfimmi illunut allanut qimagussortinneqarput.
Iluliarsuulli allami inissisimalernera pissutigalugu innuttaasut qimagussortinneqarsimasut najugarisaminnut juulip 18-ianni angerlartinneqarput.
AAMMA ATUARUK Innaarsuit eqqaannit ilulissap illikarnera takuuk
Politiilli mianersoqqussutaat suli atuuttoq Carl Sværdip oqaatigaa:
- Suli atuuppoq, aamma innuttaasut piumaffiginikuuagut arlaannik pisoqassagaluarpat politiinut kalerreeqqullugit, ))
Iluliarujussuaq Innaarsuit qanittuanut pimmat tusagassiorfiit nunarsuarmit tamaneersut aamma malinnaapput.