Mexicomi qarsutsinersuit ajornartorsiortitsipput

Illoqarfimmi Villahermosami, illoqarfiit pingaarnersaannut Tabascomut immikkoortortaasumi inuit ajornartoornerminni ima tamaviaartigaat allaat kuummit isortumit anartarfiillu imertaannit imertalersimallutik, nutaarsiassaqartitsivik Reuters taama nalunaarpoq.

Tamatuma eqqaani naalagaffiup immikkoortuani Chiapas-imi nunap sisoornerata kingornagut inuit ikinnerpaamik 16-it maqaasineqarput – maqaasineqartut saniatigut ikilerneqartut 20-upput angerlarsimaffiillu 200-t aserorneqarlutik. Taamali pisoqartinnagu tamaani najugaqartut allamut nuutsinneqarsimapput.

Chiapas illoqarfiup Tabascop kujatinnguaniippoq ullunilu kingullerni sialussuartarnerata kinguneranik nunap tamaani 80 procentia qarsutsiffigineqarpoq.

Oqartussaasunit oqaatigineqarpoq, aatsaat qaammatit arlallit qaangiuppata naalagaaffinni kujasinnerusuni qarsutsinernit eqqorneqartut angerlarsimaffimminnut utersinnaassasut. Tabasco-innarmi inuit miliuunit missaat angerlarsimaffimminnit qimarngusimapput.