Mexicomi præsidentissap Bush kamaappaa
Mexicomiorpassuit ukiut tamaasa USA-mut anngiortumik isaasartut killilersimaarniarlugit, USA-p Mexicollu akornanni ungalorsualiortoqalerpoq.
USA-mi præsidentip ungalorsualiornissamik naalakkiut ippassaq atsiorpaa – tamanna Mexicomi præsidentissap kamaatigaa:
- Berlinimi kukkulluni qarmasualiortoqarnikuuvoq, USA-lu massakkut ungalorsualiortitsiniarnermini kukkussagunarpoq, USA-mi præsidentip 1100 kilometerisut takitigisumik ungalorsualiortitsinissamik naalakkiut ippassaq atsiormagu, Mexicomi præsidentissaq Felip Calderon taama oqarpoq.
Mexicop illoqarfiisa annersaanni innuttaasut akerliussutsimik takutitsipput. USA-mi nunasisut nutaamik inatsisiliuunneqarnissaat USA-mi præsidentip siunertariagaluarpaa. Inatsisissallu taassuma imarigaluarpaa Mexicomiut USA-mut suliartortassasut, suliatillu naammassippata angerlaqqittassallutik. Taamali siunnersuuteqarneq USA-mi partiinit tapersersorneqanngilaq, pingaartumik præsidentip nammineq partiianit.
- Killeqarfitsinnik pitsaasumik ukiorpassuarni nakkutilliisimanngilagut, USA-mi præsidenti oqarpoq.
Præsidentimut qineqqusaarneq qiterpaarluariartoq massakkut præsidentiusup isummani allanngortippaa, taamaalillunilu Mexicomut killeqarfik ungalorsualiorfigitinnialerlugu. Ungalorsuassaq takissaqaaq: Københavnimiit Parisimut isorartussuseq takeqatigissavaa. USA-mi inatsisartut 8 milliardit koruunit missaat immikkoortereerpaat. Ungalorsuassap ilamernga sanaartorneqalereerpoq, taannalu 1 milliardit missaanni naleqarluni. Taamalu akisutigisumik ungalorsualiortoqassappat, missingersuutaasimasunit tallimariaammik akisunerussasoq ilimagineqarpoq. Isornartorsiuisartut oqarput ungalorsualiorniarneq qineqqusaarutaaginnartoq. Mexicomiut 11 millionit USA-mi najugaqarsorineqarput, taakkulu affaasa missaat anngiortumik nunasisuusimassangatinneqarlutik. Mexicomiut USA-mut suliartortarnerat Mexicomi aningaasarsiornermut pingaarutilerujussuuvoq.
