Mexicomi kina præsidentinngornersoq suli paasinarsinngilaq

Mexicomi innuttaasut kina præsidenterissanerlugu suli paasinngilaat. Præsidentitut qinigassanngortittoq konservativiusoq unammillertiminit 1 procent inorlugu amerlanerulaartunit taaneqarsimavoq. Unammillertaatali kisitsinermi inernerugallartut akuersaarusunngilai.

Mexicomiut maanna kisitseqqissaarnerup naammassinissaa utaqqiinnarpaat kisitseqqissaarnerlu sapaatip akunneranik sivisussuseqarsinnaalluarpoq.

Isumasiuinerit naapertorlugit socialistit qinigassanngortitaat Andres Manuel Lopez Obrador unammillertiminut konservativit qinigassanngortitaannut Felipe Calderonimut naleqqiulluni sivisungaatsiartumik siuttuuvoq.

Præsidentissarsiornermi taasisut 38 millionit ippassaq unnukkut kisinneqarmata taasinerit 420.000-t, tassa 1 procentip missaani amerlatigisut, nikagassutigalugit Felipe Caldero siuttuusoq nalunaarutigineqarpoq. Taamatut nalunaaruteqarneq unammillertaata Manuel Lopez Obradorip akuererusunngilaa:

- Kisitsineq akuererusunngilara, Manuel Lopez Obrador oqarpoq.

Qinersinermi ataatsimiititaliap naatsorsuineranut naleqqiullugu 3 millionit taasineri amigaataasut qinersiviusunillu 300-init qinersivinni 155-ini ajugaasimallutik Socialistit nalunaarput.

Taamaattumik Mexicomi innuttaasut pinngitsoqaratik taasinerit sapaatip akunnerani tulliuttumi kisinneqarnerisa naammassineqarnissaat utaqqivaat. Kisitseqqissaartoqareerpat Socialistit naammagittaalliuutissatik eqqartuussivimmut naammagittaalliutigisinnaavaat.