Aamarsuarsiornermik suliallit assaaffik imermik ulikkaartoq tikittoormassuk, qaarusuk nakkaalersimavoq.Assi: Scanpix

Mexicomi aamarsuarsiorfik nakkaammat inuit qulit matoorussaapput

Mexicomi annaassiniartartut inuit qulit annaanniarlugit maanna ulapipput.

Mexicop avannaani aamarsuarsiorfik ippassaq pingasunngornermi nakkakaammat aamarsuarsiorfimmi sulisut qulit matoorussaasut ullumimut suli matoorussaaqqapput.

Annaassiniartartullu maanna sakkutuunik qimmilisartunik ikiorneqarlutik annaassiniarsarigaluarput.

Inuit qulit saniatigut inuit pingasut annaanneqarsimapput.

Taama pisoqarpoq aamarsuarsiornermik suliallit assaallutik sulinerminni assaaffik imermik ulikkaartoq tikittoormassuk, taamaalillunilu qaarusuk imermik qarsunneqarmat qaarusuk nakkaalersimavoq.

Matoorussaasunut ilaqutaasut maanna tamatuma eqqaani annilaangaqalutik annaassiniartartunut paasissutissanik apersuiuarput.

Aamarsuarsiorfik nakkaasoq jannuaarimi 2022-mi assaavigineqalerpoq taamanimiillu manna tikillugu ajutoorfiusimanngikkaluarluni.

Aamarsuarsiortoqartillugu ajutoornerit annersaat 2006-mi pivoq, taamanimi qaartoortoqarmat inuit 65-t inuunerannik naleqarpoq.

Siornalu aamma tassanerpiaq aamarsuarsiorfik nakkaammat inuit arfineq-marluk ajunaarput.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl