Mette Frederiksenip USA-lu silap pissusianut tunngasuni suleqatigiinnerulernissaq neriuutigigaa
Danmark USA-lu silap pissusianut tunngasuni suleqatigiinnerulissasut, danskit ministeriunerata Mette Frederiksenip neriuutigaa.
Mette Frederiksen, Joe Bidenip USA-mi præsidentinngornissaata nalunaruutigineqarnerata aqaguani, tassa sapaammi taama oqarpoq.
- Suleqatigiinnitsinni nukittorsarfigineqarsinnaasoq tassaavoq, silap pissusianut tunngussuteqartoq.
- USA-p silap pissusianut tunngasuni, Bidenip oqarnera naapertorlugu, naleqqussartariaqarnissaanut siuaqqavugut. Taamaammat silap pissusianut tunngasuni suleqatigiinnerulissasugut ilimagaara, Mette Frederiksen oqarpoq.
AAMMA ATUARUK Ajugaassangasup Bidenip USA-p Parisimi isumaqatigiissummut ilannguteqqinnissaa neriorsuutigigaa
Silap pissusianut tunngasuni suleqatigiinnerup saniatigut Bidenip isumannallisaanermut tunngasuni suleqatigiinnerulernissaq anguniassagaa, Mette Frederiksenip ilimagaa.
- USA isumannallisaanermut politikkimut tunngasuni suleqatitta pingaarnersaraat, kinalu præsidentiunersoq apeqqutaanani. Tassanilu assersuutigalugu Issittoq pillugu suleqatigiinnerunissarput aamma neriuutigaara, taanna oqarpoq.
Danmark USA-lu politikkikkut niuernikkullu suleqatigiilluartut, ministeriuneq erseqqissaavoq.
AAMMA ATUARUK Mette Frederiksenip oqaaseqaataa "ajuippoq"
USA Danmarkilu Donald Trumpip præsidentiunerani attaveqatigiinnikkut arlalitsigut aaqqiagiinngittoqarpoq. Donald Trumpip Kalaallit Nunaat pisiarusunnerareermagu Mette Frederiksenimit itigartinneqarami, Danmarkimut tikeraarnissani taamaatillugulu ministeriunerup tamanna pillugu oqaaseqaataa ajuissuunerarpaa.
- Tamanna suleqatigiinnitsinnut akornutaasorinngilara. Taamani pisut oqaatsillu atorneqartut ingattarserfiupput.
- Suleqatigiileqqilertorpugut. Donald Trump taama pisoqarneraniit nalunaaquttap akunnialuit qaangiummata siullermeerlunga oqaloqatigaara, kingornalu oqaatsit atorneqartut allannngorput. Danmark USA-lu oqaatsit piinnarlugit avissaarnavianngillat, Mette Frederiksen oqarpoq nangillunilu:
- Danmark USA-lu tunngaviusumik suleqatigiilluarput, præsidenti qanorluunniit ateqaraluarpat partiimullu sorlermulluunniit ilaasortaagaluarpat. Tamanna ukiuni qulikkaani kinguaariinnilu kingullerni ersersipparput, Mette Fredeiksen oqarpoq.
