Methan periarfissanik ammaassisoq
Atuagassiap Science-p allaatigisaa naapertorlugu ilisimatusartup svenskip russinik siuaasallip paasisimavaa nunami Skandinaviap pingasoriaataanit annerusumi gassi kissarnerulersitsisartoq Sibiriap kangianiit ukiut tamaasa 8 million tonsiusoq nunarsuup silaannartaanut aniasartoq, maannamut ilisimatuut nunarsuup imartaanit tamarmiusumit aniasarsimasorisaat. Methan nunami qeriuaannartumi uninngasaraluarpoq, silalli kissatsikkiartornerani sermeq aattalerpoq, taamaalillunilu methan nunarsuup silaannartaanut aniasalerluni. Methanilu, soorlu assersuutigalugu CO2-minngarnit 20-riaat sinnerlugu kissarnerulersitsisarmat, taava silap pissusaanut tamanna anmnertoorujussuarmik kinguneqartussaassaaq, Københavnip Universitetiani nunarsuup pissusaanut sananeqaataanullu lektoriusoq Thomas Friborg taama oqarpoq.
- Immap naqqani nunamilu kulstoffeqarfiit oqimaaqatigiikkuunnaaraangamik, taava nunarsuup silaannartaa methaneqarneruleratarsinnaavoq, taamalu nunarsuup silaannartaani gassi kissarnerulersitsisartoq methaneqarnerulerneranit annertusineqassalluni.
Ajornartorsiutaavoq methan nunarsuup issittortaanit allanit aamma aniasarnersoq nalugatsigu, tamannami naammattumik ilisimatusarfigineqarsimanngimmat, Thomas Friborg oqarpoq. Akerlianilli aamma methan sermimiittoq periarfissaqarluarpoq, taanna taama oqarpoq.
Nalunngilara uuliasiortitseqatigiiffiit tamanna soqutigigaat, tassa sermeq methanimik akulik qallorneqarsinnaammat nukissiuutitullu atorneqarluni, methanilu gassitut nalinginnaasutut ittuuvoq, taannalu nukissiuutitut atorneqarsinnaasutut eqqarsaatigineqarsinnaalluni, Thomas Friborg DR-imi ilanngutassiortumut Kirsten Rosingimut oqarpoq.
