Metallicakkut Erfalasorput angerlaakkaat
Sakkortuumik Heavy-metalimik nipilersortartut tusaamasat Metallica Danmarkimi kalaallit arlallit peqataaffigisaannik, tusarnaartitseqqammerput. Nunatsinnilu Metallicakkunnik ilisimannittut amerlanerit ilisimassajunnarsivaat Erfalasorput tusarnaartitsinermi saqqumitinneqarsimasoq.
Metallicakkut, nunarsuaq tamakkerlugu tusaamasaasut, appisimaarnerat tamaat Erfalasorput ersareqaluni kusanaqalunilu kalaallinit peqataasunit nivingatinneqarsimavoq. Johannes Müller erfalasutsinnik nittarsaassisuuvoq.
- Kalaallit Nunaat avammut nittarsaakkusullugu erfalasoq nivinngarpara.
- Aamma ikinngutigalu fantasiikujuttaratta Nunatsinnut tusarnaartitsiartorsinnaasut, tamaammat kalaallit nuannarinninnerat peqataanerallu takutikkusuttarparput, Johannes Müller, tallimassaa Metallecakkunnut tusarnaariartoq, KNR-imut oqaluttuarpoq.
Taanna aamma oqaluttuarpoq, Metallicakkut atugaat kingulleq naammat erinarsortuata James Hetfieldip qummut qiviariarluni, kalaallit tusarnaariat tulluusimaarutigeqisaannik, Erfalasorput tikkuarsimagaa.
- Kinguninngua Metallicakkut sulisuat aggerpoq aperaluni erfalasoq Metallicap pisinnaaneraa, Johannes Müller oqaluttuarpoq.
Johannesip upperisimanngikkaluarpaa itigartillugulu. Uteriissimavoq kukkilaaterpassuarnillu tammajuitsussaanik tuniumasimallugu, taamaariarmallu paarlaassimapput. Misigisaq uppernarpianngitsoq uppernarnerulersimavoq.
Metallicakkut assiliisartuat aggerpoq Erfalasorpullu tigunnginnerani kalaallit tulluusimaaqisut assilillugit.
Kinguninngua Metallicakkut qujaniarlutik asseq Instagramimut ilivaat.