Meeqqat atuagaasivilisaartut, angajoqqaallu pisiniarfiliusisaartut, takornariat saaminni assiliivilisaartut. Soorlu tassa Ilulissani ulluinnarni inuuneq taamatut ingerlasartoq.
Nuimasunik tikeraartoqarneq pissutigiinnarlugu naasunik, balloninik erfalasunillu tigumiartunik tikilluaqqusisoqanngilaq.
Tyskit forbundskandsleriat Angela Merkel qallunaallu Statsministeriat Anders Fogh Rasmussen maannakkorpiaq Ilulissanut tikeraapallalaarput – soorlu ukiuni kingullerni politikerit nuimasut Ilulissiartarnerattut – nunarsuatsinni silap pissusaata allanngoriartornerata nassatarisaanik sermeq aakkiartuaartoq namminneq isiminnik takuniarlugu.
Politikerit nuimasut ussittumik pujornera pissutigalugu kingusinaalaaraluarlutik ulloqeqqata kingorna Ilulissanut tikipput, tikissimatsiaannarlutik Ilulissat Kangerluata paatungaanut Iluliarsuit ikkarlisimasut angallammik alakkartersimavaat.
Fogh aamma Merkel tusagassiortunik apersorneqarnertik ualiartoq pisoq naammasseqqammivaat.
Tyskland-ip forbundskansleria Angela Merkel Ilulissaniinnermini pinngortitarsuarmit tiguartissimasoq malunnarpoq. Aammali sermersuup sukkasuumik tiffariartorneranik tusakkani takusanilu tupannartuunerarlugit, suleqaterput Janus Maqe tusagassiivoq.
- Qallunaat Nunaat Tysklandilu pimoorullugu suliniarput, silap mingutsinneqarnerata unikaallatsinneqarnissaanik angusaqarniarnermi, minnerunngitsumik USA Kinalu paasitinniassallugit, Ilulissani Hotel Arctic-imi tusagassiortunik katersortitsinermi, Angela
Merkel oqarpoq.
Angela Merkel-ip Anders Fogh Rasmussen-illu Ilulissaniinnerat , naalakkersuisut siulittaasuata Hans Enoksen-ip atorluarniarpaa:
- Silap kissakkiartornerata kingunerisai nunarsuarmiut ilisimasariaqarpaat, tikeraat uku ikortigissavavut suleqatigalugillu, Hans Enoksen oqarpoq.
Naalakkersuisut siulittaasuat hans Enoksen qaaqqusisoralugu tikeraat Hotel Arcticimi unnugu nerersuaqatigineqassapput.
Fogh aamma Merkel ingiallortitik ilagalugit qulimiguulimmik aqagu ullaap tungaani angalaartinneqassapput. Sermip uukkaavianut angalanerminni immikkut ilisimasalimmik oqaluttuunneqarujuussapput.
