Mellembølgep matunera illersorsinnaanerarpaat

Radiokkut mellembølgekkut aallakaatitsinerup ukioq-manna kingusinnerusukkut unitsinneqarnissaanut ukiumoortumik aningaasartuutit 3,1 millinionit koruunit kisimik pissutaanngillat. Aallakaatitsissutit taakku, ukiunik 30-nik pisoqaassusillit, ukiuni tulliuttuni nutarternissaat ingerlatiinnarnissaallu aamma eqqarsaataammat atorunnaarnissaat aalajangiunneqarpoq.

Siumumeersup Karl Lyberthip paragraf 37 naapertorlugu apeqqutaanut Attaveqarnermut Naalakkersuisoq, Jens B. Frederiksen, taama akissuteqarpoq.

Karl Lyberthip apeqqutigaa KNR-ip mellembølgekkut aallakaatitsisarnerata, sumiluunniit najugaqaraanni, tusaaneqartuaannarnissaa anguniarlugu Naalakkersuisut qanoq iliuuseqarfiginiarneraat.

Nunaqarfinni najugallit kikkulluunniit KNR-imik tusarnaarsinnaanissaat anguniarlugu mellembølgekkut aallakaatitsisoqartalerpoq. Tamanna FM-ikkut nassitsissutit atorlugit ullumikkut pisarpoq, savaateqarfinnilu najugallit mellembølgekkut tusarnaartuaannartut eqqarsaatigissagaanni VSAT-mut tigooqqaassutit atorlugit KNR-ikkut aallakaatitanik tusarnaarsinnaalernissaat Naalakkersuisut anguniarpaat.

Umiarsuit mellembølgekkut aallakaatitsineq aamma pinngitsoorsinnaanngilaat, tassami silap qanoq innissaanik nalunaarutit tusarnaarnissaat pinngitsoorneqarsinnaanngilaq, inuup inuuneranik naleqarsinnaammat.

Jens B. Frederiksenilli nassuerutigaa inuit illoqarfimmiit angasissumiittut ilaasa KNR-ip aallakaatitsinera tusaasinnaajunnaassammassuk.

Tamatuma saniatigut ingerlatsinermut ukiumut sipaarutissat, mellembølgekkut nassitsissutit matuneqarnerisigut anguneqartussat nassitsissutit digitaliusut 2010-miit 2012-imut nassitsissutit analogiusut taarsersorneqarnerini taartaasussat ingerlanneqarnerinut atatillugu aningaasartuutaanerusussanut aningaasalersuinermut atorneqassasut Jens B. Frederiksen Karl Lyberthimut akissummini allappoq.