Mejdahl: Suliap naammassineqarnera nuanneqaaq
– Ilaasortalli akornanni isummat assigiinngitsut imminnut qanillattortinniarlugit ilaanni artornarsisaraluartoq, ilaasortat ataqatigiissaakkamik naammassisaqarusunnerat sulinissamut kaammattuutaalluarsimasoq, Christian Mejdahl oqarpoq.
Christian Mejdahl tulluusimaarpalulluni oqarpoq, suliap aallaqqaataaniit naammassinissaata tungaanut peqataaffigisimanera immikkullusooq pisinnaatitaaffiusutut misigisimallugu. – Isumalioqatigiissitami ilaasortat sammisanut assigiinngitsunik isumaqartarmata ilaanni artornartarsimagaluarluni suliaq pissanganarsimaqaaq. Ilaasortalli suliassaminnut tunniusimallutik ataqatigiissaakkamik naammassisaqarnissartik anguniarsimallugu maanna naammassimmassuk nuannaarutigaara, Christian Mejdahl oqarpoq.
Anker Jørgensen ministeriunerugallarami Kalaallit Nunaanni pisuussutsit naalagaaffiup pigisarimmagit apeqquserneqarsinnaannginnerarlugit oqaasii maanna qanoq isumaqarfiginerai aperineqarami, Christian Mejdahl oqarpoq, oqaatsit taakku qanganngortoq aninneqarsimammata, qanorlu ineriartornerup ingerlasimanera, kiisalu Kalaallit Nunaata Danmarkillu akornanni ataqqeqatigiinneq eqqarsaatigalugit maanna anguneqarsimasut iluarisimaarini. Namminersulernissamut inatsit akuerineqarpat naalagaaffik suli akisussaaffeqaraluartoq, pisuussutit Kalaallit Nunaannit aalajangersaaffigineqarnissaat naqissuserneqassaaq.
Siunissami, soorlu ukiut 20-t qaangiuppata naalagaaffeqatigiinnerup qanoq isikkoqarnissaa takorloorsinnaaneraa aperineqarami, Mejdahl oqarpoq taamanikkussamut suli inuiattut marluittut tapersersoqatigiittutut naalagaaffeqatigiinnerup iluani inissisimanissarput takorloorsinnaallugulu neriuutiginerarpaa.
