Meeravissiartaarniartut itigartinneqarput

Ilaqutariinnermut naalakkersuisoqarfiup, Nakorsaanerup, aamma kommunip, naggataatigullu Rigsombudsmandip meeravissiartaarnissamut akuersissutaat Danmarkimi Inatsisinik atortitsinermut ministereqarfimmi/Justitsministeriami atorsinnaanngillat.

Angajoqqaarsiat meeraq meeqqamittut isigilersimavaat 15-nik qaamateqaannartorli paarileramikku ullumikkullu meeraq arfineq marlunnik ukioqalersimavoq. Annivimminut ilaqutavimminullu attaveqarani.

-Justitsministeriamit meeravissiartaarinissaannut itigartitaavugut Danmarkimi inatsik ilaatigut allassimammat meeraq ukiuni arfinilinniit arfineq pingasut tungaanut angajoqqarsiamini najugaqarsimasussasoq, paasissutissallu amigarmata, naak paasissutissat tamarluinnaasa nunatsinni Rigsombudsmandimiit Danmarkimi Justitsministeriamut nassiunneqareernikuusut, immaqaaku pappilissat atuarsimanngikkaat.

Meeravissiartaarniartoq oqaluttuarpoq.

Angajoqqaarsiat meeqqamik sumiginnakkamut inuunermik toqqissisimasumik asannittumillu tuniserusunnerat akisoqaaq.

Ilaqutariittulli allatut sulinngiffeqarnermi nunanut allanut aallaanarsinnaanngillat, oqartussanut akuersissummik peqqaarnatik. Nunanut allanut ilinniariartorsinnaanngillat akuersissummik peqqaarnatik.

-Feeriarniarluta akikinnermik billettisereerluta aallarsinnaanissarput nalullugu utaqqivugut, akuersissummik pissanerluta nalullugu meerarput qimaannarnianngikkutsigu meeravissiartaarniartoq oqaluttuarpoq.

Ilaqutariit illoqarfimmut allamut nuunnialeramik meeqqamik arsaagaangajassimapput.

Naak ilaqutariit kommunemiit nuunniarnerat ajornartorsiutissaqanngitsutut nalilerneqareeraluartoq.

-Kommunemi oqartussaasut ilaata aallalivittugut sianerfigatigut, nuunniarnermut akuersissut amigaateqarmat aallalerutta meeraq politiinit mittarfimmut aaneqariaannaasoq. Taamaammat suna tamaat mianersuuteqqissaartariaqarparput meerarput eqqugaassanngippat, uagummiuna meerarput. kisiat kommunep paasitittuarpaatigut angajoqqaajunngitsugut kisiannili kommunemi atorfeqarluta meeqqamik paaqqutarinnittuinnaasugut meeravissiartaarniartoq oqaluttuarpoq..

Suliaq Justitsministeriap itigartitsereernerata kingorna Rigsombudsmandikkut ingerlateqqinniarneqarpoq.