Meerarsiat pitsaanerusumik perusuppaat
Meeqqat arlaleriarlutik angajoqqaarsiartaaqqaarlutik paarsilluarsinnaasutut aatsaat inissittarnerat takornartaanngilaq. Tamanna meeqqamut angajoqqaarsianullu ilungersunartoqartarpoq. Ajornartorsiut siunissami millisarniarneqarpoq.
- Siunnersuutiga ataatsimiititaliami assut suliarilluarneqarsimavoq. Tamanna assut nuannaarutigaara aammalu annertuumik tapersersorneqarnera tuppalliutigalugu. Meeqqat eqqarsartaatsimikkut ajoqutillit sumiginnakkallu politikkeritut sulininni pingaartittuarsimavakka taamaammat siunnersuutima politikkikkut taperserorluarneqarnera assorujussuaq nuannaarutigaara, Astrid Fleischer Rex siornaanngortoq tikillugu meerarsiaqarsimasoq oqarpoq.
Allannguutit malunnaateqarnerit tassaapput angajoqqaarsianngortussanut piumasaqaatit sukaterneqarnerat angajoqqaarsiat ilaat meeqqanik ikiortarialinnik paaqqutarinninnissamut naleqqutinngitsut oqallisaasareersoq. Maanna piumasaqaatit sukanneqalersut inuiaqatigiinnut iluaqutaassangatinneqarput.
- Inuunermi misilittakkat meeqqanik peroriartortunik paaqqutarinninnermi pingaarutilerujussuupput. Taamatut tunulequtaqanngikkaanni meeqqap sumiginnagaasimasup paaqqutarinissaanut piareersimasoqarsinnaanngilaq naak ajunnginnerpaamik isumaqarluni iliuuseqaraluarluni. Angajoqqaarsiat piareersimanngippata meeraq ajoquserneqarsinnaavoq. Qularutiginngilara malittarisassat sukaterneqarpata misilittagaalersut siunissami tusarluarfigisarumaarivut, Astrid Fleischer Rex KNR.gl-mut oqarpoq.
