Assi: KNR/Jonas Løvschall-Wedel

Meeqqat Illersuisuat: Meerarsiat atugarliorput

Tunumi meeqqat 14 procentii angerlarsimaffiup avataanut inissinneqarsimapput. Meerarsiallu ikiorserneqarnerat tapersersorneqarnerallu naammaginanngimmat, Meeqqat Illersuisuata Aviaja Egede Lyngep ernummatigai

- Naammanngilaq meeqqat angajoqqaarsiartaarpata inissippata tassa ajornartorsiut aaqqippoq, Meeqqat illersuisuat, Aviaja Egede Lynge oqarpoq.

Tasiilaq nunaqarfillu Kuummiut pillugit taanna nalunaarusiamini ilaatigut allaatigisaqarpoq meerarsiat angajoqqaarsiaminni atugarliortuunerminnik oqaluttuartut. Aammattaaq meeqqat ilaqutarsiallu meeqqat ajornartorsiutaat pillugit ilinniarsimasumik ikiortissamik amingaateqartartut.

- Taamaammat meeqqat ukua tamatigut ikiorserneqarnissamik tapersersorneqarnissamillu pisariaqartitsisuupput. Taavalu angajoqqaarsiat taanna ingerlalluartuugaluarlutik naammassisinnaanngikkunikku taava kikkut naammassissavaat, Aviaja Egede Lynge oqarpoq.

Meeqqat 20-t angerlarsimaffiup avataanut nuutsinneqaratarsinnaasut

Kommuneqarfik Sermersuup kisitsisaatai malillugit Tunumi meeqqat 163-it angerlarsimaffiup avataanut inissinneqarsimapput, taakkunannga 99-it angajoqqaarsiaqartinneqarlutik.

Meeqqalli suli 20-t missaanniittut angerlarsimaffimminni atugarliornerat kommunimit ernummatigineqarmat, angerlarsimaffiup avataanut nuutsinneqaratarsinnaapput.

Bibi Mikaelsen 23-nik ukiulik, Tunumi meerarpassuit assigalugit angajoqqaarsiaqarluni peroriartorpoq. Meerarsiaanerminilu aliasunneq kamaqqanerlu misigisarsimavai.

- Imminut kilertittarnikuuvunga, imminut kaatsittarnikuuvunga, imminornissannut eqqarsaateqartarnikuuvunga, Bibi Mikaelsen oqaluttuarpoq.

Inuusuttuulluni tarnip pissusianik immikkut ilisimasalimmmik oqaloqateqartarsimavoq, iluaqutigisaminik. Maannalu Inuk Hostelsimi takornarianik sullissisutut ilinniartuuvoq.

- Psykologerpassuit aatsaat oqaloqatigeqqaarlugit, Bibi Mikaelsen oqarpoq.

Isumaginnittoqarfimmi pisortaq ernumassummut paasinnittoq

Tasiilami, inunnik isumaginnittoqarfimmi pisortap, Kurt Rokholm Pedersenip, Meeqqat Illersuisuata ernumassuteqarnera paasisinnaalluarpaa. Ilaqutarsialli meerarsiartaannginneranni misissorneqarluaqqaartartut nakkutigineqarluartartullu erseqqissarlugu.

- Soorunami ernumassuteqartoq paasisinnaavara. Oqartariaqarpungali sapinngisarput tamaat sulivugut. Aamma qularinngilarput meeqqat angerlarsimaffiup avataanut inissinneqartut, inissiffigisaat meeqqanut pitsaanerpaasut, Kurt Rokholm Pedersen oqarpoq.

Qulaarpaami tunu pillugu unnugu oqallittoqassaaq. Oqallinnermi Bibi Mikaelsenip meerarsiaasimanini pillugu oqaluttuartoq tusarnaarsinnaavat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat