Meerarsiassaminnik Nunavumut aallertalerput
Inuit meerartaat 100-t sinneqartut ukiuni arfinilinni kingullerni ilaqutariinni naggueqatigiinnut inunnut ilaanngitsuni meerarsianngortalerput – Canadami Nova Scotiami, NewFoundlandimi Prince Edward Islandimilu.
Meerarsianngortitsisarnerit inuit namminneq aaqqissortarpaat – angajoqqaarsiassarsiorluni allagarsiinikkut imaluunniit inuit nalunngisat aqqutigalugit.
Nunavumi allagarsiinikkut meerarsiassarsiorneq inerteqqutaagaluarpoq, angajoqqaarsiassarsiornerli inerteqqutaanani.
Nunavumi inunngortartut Canadami nunap ilaannut allanut naleqqiullutik amerlanersaapput. Inuit 1.000-iugaangata inunngortut agguaqatigiissillugu 24,1-iusarmata. Kisitsit nunap sinneranut sanilliullugu marloriaataavoq.
Naartusut amerlanerpaartaat inuusuttuarannguusarput, naartunaveersaatinik atuisoqarpianngilaq naartuersittoqarpiarnerlu ajorluni.
Naggueqatigiit inuit akornanni meeqqanik allanut tunniussisarneq aamma ileqqutoqqanut ilaavoq.
Meerarsianngortartut amerlanersaat angajoqqaavimminnut attageqartarput, assersuutitut taaneqarput ilaqutariit Robertsikkut, nukappiarannguamik, Ianimik atilimmik Arviat-miit Nunavumiittumit ukiut arfineq-pingasut matuma siornagut meerarsiartaartut. Ianip angajoqqaavi ulloq manna tikillugu angajoqqaarsiaasut attaveqarfigisarpaat.
Assinik imminut nassittarput, Ianilu aanaminit aaqqatinik puisip amianik sulianik aamma ukiut ilaanni juullimut tunissutissarsisimasoq CanWest News Service-imit allaaserineqarpoq.
