Meerarsiartaarusuttut imaaginnavilersimapput
Haitimi nuna sajoreersorlu nunat tamat tv-qarfiini meeqqat sammineqangaatsiarput, nunalilumi tamani inuppassuit ikiuukkumallutik meerarsiartaarusuttut imaaginnavilersimallutik.
Tamakkuli mianersoqquneqarput, tassami meerarsianngortartut anginerumaat ilaatigut sakkortuunik misigisaqartarsimapput, ilaatigullu angajoqqaavisa tamaaginnartarsimagaat, imaluunniit suli ilaqutaqartarsimagaluarlutik meerarsianngortinneqartarsimasut oqaatigineqarmat. Taamaattumik Tuluit meerarsiartaarumasunik sullissisarfianneersut mianersoqqusipput, tassami Hollandimiut ulluni makkunani qassiiliuutaalersimapput, taakkumi timmisartoq Haitiliaateriarlugu meeqqat 109-t Hollandiliaassimagamikkik.
Hollandimiulli nassuiaapput meeqqanik aallernissartik nunap sajunnginneranili sulissutigereersimagitsik, meerarsiartaarnissamullu akuersissutit eqqartuussisumit atsiorneqarnissaat utaqqiinnarsimanerarlugit.
Nuna sajunngikkallarmalli Haitimi meeqqat 380.000-it angajoqqaaqanngitsut tuluit aviisiat The Independencep allaaserisimavaa.
Taama DR-ip ilanngutassiortua Troels Aagaard oqaluttuarpoq.
Nerisassat nakorsaatissallu Haitimukartussat kiisami iluamik anngussuutilerput. Tassami USA Haitimi timmisartut mittarfianni tattoqisaatsitsiunnaarsimammat. Ajunaarnersuulli annertussusia nakuusernerillu annertusiartuinnartillugit ikiuiniarneq suli akimmisaarfiuvoq.
