Meerarsiaqartarneq pillugu aappaagu ataatsimiittoqassaaq

Nuummi aappaagu meerarsiaqartarneq pillugu ataatsimiittoqassaaq - tassa

meeqqat angerlarsimaffiup avataanut inissinneqaraangata pisortanit neqeroorutigineqartartut immikkut sammineqassammata.

Kalaallit angajoqqaarsiaasartut peqatigiiffiat Nunani Avannarlerni angajoqqaarsiat ataatsimiilerpata qaaqqusisuussaaq.

Meeqqat angerlarsimaffiup avataanut inissinneqartariaqaleraangata angajoqqaarsiaasartut Nuummeersut Sisimiuneersullu Nunani Avannarlerni angajoqqarsiat kattuffiata ukiumoortumik Oslomi ataatsimiinneranni peqataaqqammerput, tassanilu meerarsiat meeqqallu atuarfiat oqallisigineqarput.

Septembarimi Nuummi ataatsimiittoqalerpat Nunani Avannarlermiut meeqqat angerlarsimaffiup avataanut inissinneqartarnerannik misilittakkaminnik oqaluttuarniarput, Nuummi angajoqqaarsiat peqatigiiffianneersup Ellen Sofie Chemnitzip Nunat Avannarliit allaanerusumik sukkanerusumillu suleriaaseqartartut oqaatigai.

- Ilaatigut Islandimi ”Meeqqat Illoqarput”, tassani meeqqat, inuusuttut ilaqutariillu immikkut ilinniagaqarsimasunut saaffiginnissinnaapput, soorlu politiinut, nakorsanut isumaginninnermilu siunnersortinut. Taakkua aamma saaffiginnittunut apersuisarsinnaapput, tamannalu aallaavigalugu inunnik ataasiakkaanik ilaqutariinnillu siunnersuisinnaasarlutik, Ellen Sofie Chemnitz oqarpoq.