Meerarsiaq ilaquttaminut utertussanngorpoq

Nukappiaqqap inunngornermini angajoqqaarsianut pisup, maannalu qulinik qaammatillip, anniviata meeqqani Maniitsumut marsip ulluisa 26-ianni aasussanngorpaa, tamanna Sisimiuni Qeqqata Kommunianit ippassaq nalunaarutigineqarpoq.

Meeqqap arnaminut pinissaata kiisami ullulerneqarnera ilaqutaviusut assut nuannaarutigaat.

- Anaanaasup efterskolernini unitsissavaa, taava peqatigalugu ernutarput Maniitsumut aassavarput, aanaajusoq aterminik isertuusserusuttoq ilisimatitsivoq.

Meerarsiap ilaqutavimminut pinissaa assut angajoqqaarsianut ilaqutaviusunnullu akueriuminaatsumik oqartussaasunit suliariniaaluusarneqarsimavoq, assullu susoqarnissaanik nalornisitsiuarsimalluni.

Angajoqqaarsiat naalungiarsummik inunngorneraniit paarsisut nukappiaraq meeravissiartaariniarlugu utaqqisitaasimasut, suli tupaqqapput.

- Meerarput - taamatummi isigigatsigu - nammineq pitsitut isigaarput, aamma anaanavimmi ilaqutai ilisarisimanngilluinnarpai, ataatarsiaasoq aterminik taaseqqusinngitsoq oqarpoq.

- Ippassaq allagarsiatsinni allaqqavoq nukappiaraq annivimminit aaneqassasoq – kingornalu aanamini privatimik isumaqatigiissuteqarsimaneq aallaavigalugu najugaqalissasoq, angajoqqaarsiat nangipput.

- Aamma allakkatigut erseqqissaatigineqarpoq meeravissiarilernissaa siunertaralugu meeqqamik paarsinerput tamaanga killeqartoq, ataatarsiaq aliasoqisoq oqarpoq.

- Meeqqamik arsaagaanissarput akuerineqarsinnaanngilaq. Meeraq ilaquttaminut ilisarisimanngisaminut pilerpoq. Meeqqap misigissusai matumani eqqarsaatigineqarsimanerpat, taamaattoqarpasinngilaq, ataatarsiaq aperaaq.

Aanaajusoq meeqqamik tigummisaqalersussaq qilanaaqaaq.

- Tassami naalungiarsuk sapaatip-akunnerinik arfinilinnik utoqqaatigisoq arnaata utertinnialermaguli piaartumik tigunissaa suliniutigiuarsimavarput. Utaqqisitaaneq uagutsinnut aamma artornarsimaqaaq, pingaartumik anaanaanut, aanaajusoq oqarpoq.

- Panipput tikippat meeraanik aalleqatigeriarlugu angerlarsimaffitsinni ineqatigissavarput. Arnaa ilinnialernissami tungaanut suligallarumaarpoq, aanaajusoq misigissutsimigut attortissimaqisoq naggasiivoq.

Qeqqata Kommuniani pisoq pillugu oqaaseqartoqarumanngilaq, suliaq inunnut ataasiakkaanut tunngasuummat.