Meerarsianngortitsisarnermut pilersaarutit kommuninit malinneqartanngillat

Aamma iliuusissamik pilersaarusiortoqarsimagaluaraangat pilersaarusiaq malinneqarneq ajortoq, Elisa Berthelsen Nuummi ukiorpassuarni meerarsiaqartartoq, oqarpoq.

- Inatsisit malillugit handleplanip suliarineqanngittarnera meeqqanut angajoqqaaviusunut aqngajoqqaarsianullu nalorninartorpassuarnik kinguneqartarpoq. Ilaannikkut piffissaq sivisoorujussuaq qaangiutereersoq aatsaat suliarineqartarpoq, suliarineqarsimagunilu malinneqarneq ajorput qaqeqqinneqaratillu, Elisa Berthelsen nassuiaavoq.

Meeqqanik inussuttunillu ikiorsiisarneq pillugu Inatsisartut peqqussutaat nr. 1. 15. april 2003-meersoq atuutilermat peqqussutaalerpoq, kommunalbestyrelse meeqqap angerlarsimaffiup avataanut inissinneqarnissaanik aalajangiitinnagu iliuusissanik pilersaarusiaq suliarineqariissasoq. Aalajangiinissarlu tuaviuussaasimappat pilersaarusiaq kingusinnerpaamik ullut 14-it qaangiutsinnagut suliarineqassasoq. Siunertaavoq meeqqamut inuusuttumullu siunertaqarluartumik suliniuteqarnissap qularnaarnissaa. Tamannali pineq ajunngisaannangajattoq Maniitsumi pisup kingulliup takutippaa. Meeraq inunngormalli maanna qaammatit qulingiluassaa angajoqqaarsianit paarsarineqartoq, aanaakkuisa tigunialerpaat. Tamanna iliuusissamik pilersaarusiaqannginnermut takussutissaalluarpoq. Elisa Berthelsen oqarpoq, meeraq qitiutillugu oqaaseqartarneq nuanneraluartoq, kisiannertaqartoq.

- Nalorninartorparpassuarnik inuunerani kinguneqartarpoq. Meeqqap inuusuttulluunniit naluaa qaqugu angajoqqaavimminut ilaqutavimminulluunniit utissalluni aamma nalunaa qanoq sivisutigisumik inissisimaqqassanerluni. Soorlu pulaartarneri aaqqissuunneqarsimappata, taakkulu isumaginnittussap malitsinngippagit taava kia suna suliarissavaa? Elisa Berthelsen aperaaq.

Angajoqqaarsiaasut aamma tuaviortumik tigusisariaqartarput.

- Aaqqissuunneqanngisaannarpoq, meeqqat unnuaannarsuakkut ilaanni tigusinnaasaratsigit. Aqaguani kommunimit saaffigineqarnissarput utaqqisarparput. Sivisunerusumillu meeraq tigummineqassatillugu taanna nilliaatigiuartagarput handleplan aaqqissuunneqarneq ajorpoq. Kiisa siutaat immaqa amiilerpagut, angajoqqaarsiaasartoq oqarpoq.

Iliuusissamik pilersaarusiortoqanngikkaangat meeqqat, angajoqqaarsiaagut angajoqqaaviusullu maleruagassaqarneq ajorput.