Meerarpassuit tusaaniarnermikkut ajoqusersimasut

Danskit ilisimatuutut misissuisut paasisimavaat meerarpassuit piffissap ilaani nipimik tusaasartut siutiminnilluunniit aviutitsillutik, tamannalu ilungersuullugu iliuuseqarfiginngikkaanni siutit ataavartussamik ajoquserneqarsinnaapput.

Ilisimatuutut allaaserisap nutaap ersersippaa ilisimatusaatigineqartuni meeqqat 16-inik ukiullit pingasuugaangata marluk nipimik tusaasaqartarnertik ajornartorsiutigisimagaat.

Ilisimatuutut misissuisup Susanne Nimholdt Rosingip Syddansk Universitetimeersup tamanna ima oqaluttuaraa:

- Meeqqat misigisarpaat tassanngaannaq nipimik tusaasaqarneq - tinitus - tassa nipi niaqqumi peqquteqarani takkuttoq, aammali tinituseqarnermik ajoqusernerit naalaarutitigut siutequtitigut nipilersuutinik nipituallaamik tusarnaartarnerup kinguneranik pinngortarunartunik.

Meerarpassuit tinituseqarlutik ilisimasanngilaat. Nipit niaqqumiittut taakkununnga naliginnaalluinnartutut isigineqarput.

- Soorlu nukappiaraq anaanaminut oqarsimasoq: Nalunngilat nipi taanna niaqqunniittoq, ippassaq taanna pissutigalugu sinissinnaanngilanga!

Taamaalillutik ilaqutaasut paasivaat nukappiaraq tinituseqartoq, arnaami eqqarsarpoq taama tusaasaqarneq naliginnaanngitsoq.

Meeqqamik nipinik nipituunik atuisarneri angajoqqaat eqeersimaarfigisariaqarpaat. Tusaaniarnikkummi ajoqusernerit meeqqanut kingusinnerusukkut ajoqusiisinnaasut, Susanne Nimholt Rosing oqarpoq.

- Annilaangatigaarput meeqqat tusaaniarnikkut ajoqusernissaat, tusilartunngujaarpallaarlutik tassalu tusartaatitaartariaqalerlutik.

Taamaattumik taassuma angajoqqaat siunnersorpai pisorpalunniit meeqqat unitsitsiartarnissaannik.

- Apeqqut silatusaarluta aaqqiiviginiassavarput, soorlu aamma soqutigigipput meeqqatta sodavanditorpallaaratillu mamakujuttutorpallaannginnissaat, misissuisoq naggasiivoq.