Meeraq tupinnaannartumik aniguisoq angerlarpoq
Ilaquttat, ikinngutit ilisarisimasallu amerlaqalutik Paalu anaanaalu tikilluaqquniarlugit mittarfimmi utaqqipput. Nukappiaqqap ikinngutai tikilluaqqussutinik allagartarsualiorsimapput assatik titartarlugit, allallu erfalasunik aalatererrapput.
- Periuserisartagai taavalu killiffia, taakku takunissai pissangagivakka soorunami pakkunnissaa maluginissaalu aamma pingaarnerupput tassa taakkua siulliutissavakka, Paalup ataataa, Elias Inusugtoq, oqarpoq nangillunilu:
- Ippassaani oqaluukkatsigu isiginnaajutigalugu paarngortuinnaagami taavalu periorisartakkani periusigisarlugit taamaallaat niumini nimeqarnini ippigilaaginnarpaa kisianni sinnera malunnaateqanngilaq soorunami kiinaa suli malunnalaaraluarpoq. Kisianni allakkut iluamik malunnaateqanngilaq, Elias Inusugtoq KNR-imut oqarpoq.
ilaqutariit tikittoorlutik kaffisortitsiniarlutik piareersarsimapput, amerlasuullu kaffisoriarnissaat ilimagalugu.
- Qarasaaniittoq ukiut ingerlanerani paasinarsiumaarpoq qanoq ajoqusersimatiginissaa kisianni soorunami ajoquseqqavoq, najungasui arfinillit niunngualu taavalu niaqua aamma quppasseqqalluni. Suli nalilersoruminaakkallappoq qanoq ajoqusersimatiginini kingunerlutsikkumaarai. Qarasaanik aamma taanna misissuisoq oqarpoq tupinnartuliaanerarlugu, Elias Inusugtoq nuannaarluni oqiliallassimmarpasittorlu naggasiivoq.
