Meeraq ikiorneqarnermini sunniuteqaqataasassasoq
Nutarterneqarpoq apriilip 14-ani nal. 14:03: Meeqqat angerlarsimaffiup avataanut inissinneqartut 2014-imi 648-sut oqaatigigaluarparput. Tamannali kukkuneruvoq, nalunaarsorneqartummi katillugit 2014-imi 648-pput.
Taama periaaseqarnissaq isumaginninnermik suliaqartorpassuit maanna ilikkarsimalereerpaat, ilaatigut atuagaq ilitsersuut "Ilaqutariinni aqqutissioqatigiinneq"-mik qulequtaqartoq atorlugu.
- Meeraq akuutinneqarnerulissaaq aqqutissioqatigiinnermilu tusaaneqarluni. Taava aamma angajoqqaat peqataatinneqavissapput, Isumaginninnermut Aqutsisoqarfimmi immikkut siunnersorti, atuakkamillu suliarinneqataasoq, Maria Forberg oqarpoq.
AAMMA ATUARUK Ilaqutaariit ajornartorsiortut aqqutissiuunneqassasut
Atuagaq inunnik isumaginninnermik suliaqartunut ilitsersuutaavoq periusissianik imaqartoq.
Meeraq inuusuttorluunniit ajornartorsiuteqaraangat ilaqutariit atuagaq "Ilaqutariinni aqqutissioqatigiinneq" atorlugu aqqutissiuunneqartassapput.
Taava aamma meeraq ilaqutariillu peqatiginerisigut siunissami attanneqarsinnaasunik pitsaasunik aaqqiissuteqartassapput.
- Ajornartorsiutit mikisut angisuulluunniit ilaqutariinni aqqutissioqatigiinnermi oqaluuserineqarsinnaapput, Maria Forberg oqarpoq.
Angajoqqaat avissimanerannut, inuusuttut naartusut, angajoqqaap toqunerani napparsimaneraniluunniit imaluunniit meeqqap angerlarsimaffiup avataanut inissinneqarnerani angerlartinneqarneraniluunniit suliat tamatumunnga assersuutaasinaapput.
Maria Forberg naapertorlugu meeqqat angerlarsimaffiup avataanut inissinneqarnikut 648-t 2014-imi nalunaarsorneqarput. Inissinneqartut periusissiornikkut ikilinissaat siunertaavoq.
- Isumaginninnermut Aqutsisoqarfiup nunatsinni tamarmi angerlarsimaffiup avataanut inissinneqartut ilaatigut aqqutissioqatigiinnermi periuseq atorlugu ikilisinneqarsinnaassasorai, immikkut siunnersorti Maria Forberg oqarpoq.
Meeqqap peqqissusia ineriartorneraluunniit eqqasunnaraangat navianartorsioraangalluunniit ilaqutariit aqqutissioqatigiinnissaat Isumaginninnermut Aqutsisoqarfiup neqeroorutigisinaavaa.
