Meeraq filmiliaritittartutut peqataarngaartoq

13-nik ukiulik Bebiane Kreutzmann filmertarfimmi siullerpaamik unnugu isiginnaarneqarsinnaassaaq. Tamanna pissaaq filmi Lærkevej Danmarkimi filmertarfinni takuteqqaarneqalerpat.
Allattoq Noah Mølgaard
februaarip 02-at 2012 09:26

Filmi Lærkevej tv-mi aallakaatitassiami taamatut atilimmit aallaaveqarpoq taannalu tv2-mi aallakaatinneqartareerpoq. Filmimi Bebiane Kreutzmann Selmaasaarpoq taassumalu arnaa toqusimavoq. Tv-mi aallakaatitassiami Selma silappaarissuuvoq pisussaaffimminik naammassinnittartoq, nangeqattaartumili inuttaasup pissusaa allanngulerpoq.

- Selma filmimi allaanerulluinnarpoq tv-mi nangeqattaartumut sanilliullugu, arnaami toquvoq. Tamatuma kingorna gothinngorsimavoq siumullu takorruuisalerluni, aamma inuttaa imminut eqqumiigisalersimavoq, Bebiane Kreutzmann oqarpoq, filmimi goth-inngorsimanini pissutigalugu qernertunik pinkimillu qalipaatilinnik atortoq inuillu niaquisut ittunik ujamimmioqartalersimalluni.

- Imaallaammi misilippara, taamaasillungalu paasivara piviusumik gothinngornaviarnanga isumaqarpungami tamanna uannut tulluartuunngitsoq, illarluni oqarpoq.

Arnaa Helene Kreutzmann Sisimiuneersooq Bebianili pingasunik ukioqartoq Danmarkimut nuussimapput. Bebianellu pissangagisorujussuuai filmi pillugu qisuariaataajumaartut.

- Nalunngilara Lærkevej nittartakkamini nuannarinnitserpassuaqartoq, tassanilu assigiinngitsorpassuarnik allaaserittoqartussaammat qilanaarpunga, Bebiani Kreutzmann oqarpoq.

Sapaatip akunnerata ataatsip matuma siorna qaaqqusanut filmi takuteqqaarneqarmat peqataagami misigisani nuannernerarpaa.

- Assut pissanganarpoq. Imperialimi inuppassuit najuupput. Aallaqqaammut ittoornalaaraluarpoq kisianni nuannersipallappoq. Filmimut seqertitsivissuaq angeqaaq, tassanilu eqqarsaannarpunga kanngusunnassagaluartoq arlaata illaatigippatigut, Bebiane Kreutzmann oqarpoq.

Bebiane Kreutzmannip kissaatigaa isiginnaartitsinermut ilinnialernissani taamaasilluni isiginnaartitsivoq inuussutissarsiutigilerniassagamiuk. Aallartilluareerpormi. Lærkevej-ip saniatigut filmimi naatsumi qarasaasianullu pinnguaammi peqataareerpoq. Qaammatillu tulliani Det Kongelige Teaterimi peqataaniarpoq isiginnaartitsisut Revolver-Trilogien peqataaffigissagamiuk. Pisassarpassuaqalerneq ulapaarnarsinnaammat unikaallalaarallarniarluni pilersaarpoq.