Meerallit meeraqanngitsunit pilluarnerunngillat

Nangilersuineq, nerisassiorneq aamma pinngussat sumi tamaanniittut, tamakkuupput angajoqqaat, meeqqat qungujoqqaarnerannit, alloriaqqaarnerannit atualeqqarnerannillu maluginiarnerusagaat.
Allattoq Elisa Isaksen
marsip 23-at 2009 17:39

Taamaattumik angajoqqaat inersimasunit meeraqanngitsunit pilluarnerunngitsut, tuluit misissuisuisa paasisimagaat, aviisimi Politikenimi allaaserineqarpoq.

- Inuit inooqatigiittarnerannik ilisimatusarfik meerartaartarnerup nuannaarnerullu imminnut ataqatigiinnerannut tunngasunik nassaassaqanngingajappoq, taama nassuiaavoq Dr. Nattavudh Powdthavee, Tuluit Nunaanni York Universitetimeersoq, atuagassiami ‘The Psycologist’-imi allaaserisamini.

Nakorsap taassuma oqaatigaa, tuluit inersimasut misissuiffigineqarnerisa ersersikkaa, inersimasut meerallit meeraqanngitsullu inuunerisa naleqassusiat assigiiginnartoq.

Aamma nunarsuarmi nunani allani misissuinerit ersersippaat, angajoqqaat inersimasunit meeraqanngitsunit pilluarnerusutut taaneqarsinnaanngitsut.

- Europami USA-milu misissuinerit ersersippaat, angajoqqaat inersimasunut meeraqanngitsunut naleqqiullutik inuunermik nuannaaruteqannginnerusartut, Nattavudh Powdthavee oqarpoq.