Meeraaraq qimarngunneqartoq suli ujaaraat
Nukappiarannguaq inunngoqqammingajattoq, angajoqqaaminit peersitaasussaagaluarpoq, angajoqqaavi ikiaroornartunik sakkortuunik atornerluisuummata. Meeqqap arnaa kalaaliuvoq 34-nik ukiulik.
Aappariit meeqqaminnik arsaarneqarnissartik pinngitsoorumallugu meerartik tallimanngormat qimarnguppaat. Kisianni anaanaasup ikiaroornartunik sakkortuunik atornerluisuunera pissutigalugu meeraaraq kingunerlutsitsivoq ikiorneqanngikkunilu inuunera uloriartorsiorsinnaalluni. Taamaattumik Danmarkimi nunanilu allani sukumiisumik ujaasisoqalerpoq.
- Meeraaraq suli nassaarinngilarput. Kisianni qanittukkut nassaarineqarnissaa neriuutigaarput. Tassami piffissaq sivitsoraluttuinnartillugu ilungersunarsiartorpoq, ujaasinermi aqutsisoq Lars Bjerregaard Jyllandip Kujataani politiineersoq oqarpoq.
- Danmarki tamakkerlugu ujaasivugut, aappariinnillu takunnissimallutik saffiginnittartut tamaasa nuannaarutigeqaavut, Lars Bjerregaard aviisimut Poltikenimut ullaaq manna oqarpoq.
