Meeraarannguaq nalaatsornikkut politiinut sianersimavoq
Canadami meeqqap aqqaniliinnarnik qaammatillip qanittukkut ajornartorsiulernermi sianerfiusartoq 911 sianerfigisoorpaa, taamalilluni angunni ikiaroornartumik cannabisimik naatitsisartoq paasisaatittoorlugu politiinit tigusaritillugu. Taama Sky News allaaserinnippoq.
Politiit isumaqaramik ajornartorsiulerluni sianertoqartoq, sianertorlu oqalunneq sapilersimasoq, sianertup najugaanut ornigutipallapput. Matulu ammarumaneqanngimmat politiit iserput.
- Meeqqap angutaata takugamisigut annilaartorujussuuvoq, sianersimannginninilu erseqqissarlugu. Taava nukappiaraq aqqaniliinnarnik qaammatilik oqarasuaatip normuinik toorsisaqattaartoq naammattoorparput, Janelle Canning politiineersoq oqaluttuarpoq.
Politiit naak kukkunikkut sianerfigineqaraluarlutik illu misissuiffiginiarlugu aalajangerput, taamalu inini parnaaqqasuni marlunni marijuana 500 kiilu nassaaralugu.
Taava nukappiarannguup angutaa 29-nik ukiulik tigusarineqarpoq ikiaroornartumillu annertuumik naatitsisartutut unnerluutigineqarluni.
Nukappiaraq oqartussaasunit arsaarinnissutigineqarpoq, maannali arnaminiittoq oqaatigineqarluni.
