Meeraaqqat pillugit isumassarsiorfissaqalerpoq

Meeraaqqat inoorlaat qanoq atisalersorsimatigisassappat, ukiukkut qanoq issitsigisuni silami sinitsinneqarsinnaappat, meerartaarnermi sulinngiffeqartarneq qanoq sivisutigisarpa, meeraaqqat sutortinneqarsinnaappat, suaasartortinneqarsinnaappat?

Apeqqutinik taama ittunik allarpassuarnillu apeqqutissalinnut, meerartaartussanut kiisalu meeraaraatilinnut isumassarsiorfiusinnaasoq internetikkut quppersagaq nunatsinnut immikkut naleqqussagaq atulerpoq.

Tamatuminnga isumassarsisoq Hanne Rasmussen ima oqarpoq:

- Naartullunga angerlarsimasaqattaarlunga paasissutissanik internetikkut ujarlertarama, naartulluni apeqquterpassuit apeqqutigineqarsinnaasut akissutissarsiniarlugit. Eqqumiigisarakku paasissutissanik Kalaallit Nunaannut tunngasunik soqannginnera, taamaalillunga uiga ikiorsiullugu aalajangerpunga quppernermik pilersitsiniarlunga. Hanne Rasmussen nassuiaavoq.

Hanne Rasmussenip apeqqutigisarnikuusani inunnillu allanit atorneqarsinnaasunik allattueriarluni internetikkut quppernermik ilusilersuilluni aallartissimavoq.

- Nunatsinni pissutsit Danmarkimut naleqqiullugit allaaneroqaat, assersuutigalugu aperisoqarsinnaavoq: meeraaqqat atortui suussappat, barnevognit oqorsaatitaqassappat, meeraq qanoq atisalersorsimatigisassava, suut nerisinnaavaat, kalaaliminertorsinnaappat? Danmarkimi barnevognit atoruminartut assakaasui kaajallattartut nunatsinni atussallugit uuminarsinnaapput, ilaatigut illoqarfinni allani aqqusernit pitsaasannginnerat eqqarsaatigalugu. Aamma nakorsiartarnerit Danmarkimut naleqqiullugit allaanerusarput. Tamakkorpassuit ilanngukkusullugit qupperniliorpunga. Hanne Rasmussen oqarpoq.

Internetikkut qupperneq 15-inik ilaasotaqalereerpoq.

Hanne Rasmussen uinilu tallimanik meeraqarput.

Hanne Rasmussen aamma oqarpoq, meeraaqqerisunik soorlu sundhedsplejerskenik ernisussiortunik assigisaannillu suleqatissarsiulereersimalluni. Qupperneq qallunaatuinnaq maannamut suliaavoq, aasaaneranili feeriarneq naammasseriarpat kalaallisut aamma ikkunneqassaaq.

Qupperneq takuneqarsinnaavoq uani: www.baby.gl