Meeraaqqat nerisassaat navianartunik akullit piiarneqarput

Meeraaqqat nerisassaat sequtsikkat akuutissanik navianartunik akullit Pisiffimmi akikillillugit tuniniarneqartut ingerlaannartumik piaarneqarput.
juunip 29-at 2010 11:25

KNR-ip ullaaq saqqummiuppaa meeraaqqat nerisassaat aserortikkat Nuummi Pisiffimmi sapaatip akunnerani uani neqeroorutaasut. Nerisassat taakku juulip aallaqqaataaniit inerteqqutaalissapput tuniniaqqusaajunnaarlutillu, puuisa matui akuutissanik navianartunik akoqarneri pissutaalluni.

Pisiffimmi pisortaaneq, Per Steen Larsen KNR-imut ilisimatitsivoq ingerlaannartumik Nestlép meeraaqqanut nerisassiai sequtsikkat igalaaminerniittut Pisiffimmi piiarneqarsimasut.

- Nioqqutissat taakku ingerlaannartumik peerpavut. Ajuusaarutigisatsinnik kukkusoqarsimavoq, pisisartullu akikillisanik taakkuninnga pisisimasut, pisiamik akiinik pisiffimminnut saaffiginnillutik utertitsinnaapput, Per Steen Larsen oqarpoq.

Meeraaqqat 0-uniit pingasut angullugit ukiullit nerisassaasa puuisa navianartumik bisphenol A-mik akoqarnerat pissutigalugu sananeqartarneri danskit inatsisitigut juulip aallaqqaataaniit inerteqqutinngortippaat.

Inatsit nutaaq Namminersornerullutik Oqartussani uumasut nakorsaqarfiannit pisiniarfinnut maajip 21-anni nassiunneqarpoq, bisphenol A-mik akulinnik inerteqquteqalernermik imaqartoq, inatsillu tamanna aamma Kalaallit Nunaanni atuutissaaq.