Meeraalluni Danmarkimut aallartitap atuakkiaa saqqummerpoq

Helene Thiesen, kalaaliaqqat 21-t peqatigalugit Danmarkimut 1951-imi aallartitaasoq, eqqaamasalikkersaarutiminik atuakkiorpoq qulequtserlugu ”Maligassaatitaagama”.
Allattoq Arne Mølgaard
marsip 22-at 2011 17:19

Atuakkiap imaraa 1951-imi Helene Thiesenip meeraalluni kalaaliaqqat allat 22-it peqatigalugit Danmarkimut aallartinneqarnermi misigisaanik.

Kalaaliaqqat 22-t 1951-imi Danmarkimut aallartinneqarnerat pillugu oqaluttuaq Tine Bryldip atuakkiaaniik ”Ajunnginnerpaamik Isumaqarluta”-miik annerusumik tusaamaneqalerpoq, kingusinnerusukkullu siorna ukiakkut saqqummerpoq qallunaat meeqqat aallartinneqartut pillugit filmiliaat ”Eksperimentet”. Aallartitaasimasut ilaat, Helene Thiesen ullumikkut nunat avannarliit illuutaanni Nordatlantens Brygge-mi atuakkiani ”For flid og god opførsel” soqutigineqarluartumik saqqummiuppaa. Atuakkiap Helenip taamanikkut misigisarsimasaanik assigiinngitsunik imaqarpoq. Atuakkamik saqqummiinermut atatillugu filmi ”Eksperimentet” DVD-nngorlugu saqqummiunneqarportaaq. Helene Thiesen ima oqarpoq.

- Assorujussuaq nuannaarpunga. Nuannerluinnarpoq ulloq manna tikikkakku atuakkamik nammineq allatannik saqqummersitsiffiga. Atuakkami itisilerlugu oqaluttuaraara Røde Korsip meeqqanut angerlarsimaffiutaani ukiuni arfineq pingasuni misileraatitut inuusimanera. Aappaatigut artornarsimagaluartoq aammali oqaluttuaralugu iluaqutaavoq. Oqaatigisinnaavarami pisimasup oqaluttuarisarnera uanga iluatigisimaqigakku, tassami sapinngisannik qaangerniarsarisimagakku, Helene Thiesen oqarpoq.

Helene Thiesenip atuakkiani ukiut sisamat matuma siorna aallartippaa.

- Ukiut sisamat matuma siornatigut Danmarkimi pikkorissartoqarpoq taallugu ”Inuunerit Oqaluttuariuk”. Paaserusussimavara inuunera oqaluttuarisinnaaneralugu – taamaaliorpungalu, Helene Thiesen oqarpoq.

Taassuma oqaatigaa atuakkiornermini misigissutsit assigiinngitsut atorsimagini.

- Atuakkiornerma ingerlanera nuannerluni artornarsimavoq. Kisianni atuarnissaa qilanaarisinnaavarsi assigiinngitsunik imaqarmat, Helene Thiesen naggasiivoq.

Helene Thiesenip Danmarkimut aallartitaareernermik kingorna Nuummi ilinniartuunertik pillugu atuakkioqqinnissi eqqarsaasersuutigaa.

Atuagaq Illu Atlantikumi Københavnimiittumi saqqummersinneqarpoq.