Meeraalluni aallarussaasoq: Kiisami qamuuna eqqissivunga
Canadami KNR-ip ilanngutassiortuata Marianne Stenbækip, atuarfinni najugaqarfiutigisuni najugaqarsimasut pisortatigoortumik utoqqatserfigineqareersullu, Peter Irniq oqaloqatigaa.
Peter Irniq oqaluttuarpoq, ilaqutariit aasivianniitillutik pinngitsaalisaalluni peersitaalluni. Taamaalluni palasi tikippoq angutaalu oqarfigalugu: “Maanna Piitaq aallarutilerpara, akerlilersuissagussi Piitap angutaa parnaarunneqassaaq, meeqqallu tapiinik pisarunnaassaasi”. 1958-imi taama pisoqarpoq, taamanikkut Peter Irniq aqqanilinnik ukioqarpoq.
Taassuma aamma oqaluttuaraa mattuttunit arnanit palasinillu kinguaassiuutitigut atornerlunneqartarluni aamma Inuktitut oqalukkaangami unatarneqartarluni.
Oqaluttuaraattaaq atuartut ilisimatinneqartartut eskimuut sianiitsuusut atuartillutillu kridtimik niaqqumigut milorneqartarluni imaluunniit niaqquni iikkamut anaarlussaanneqartartoq.
Taamaattorli oqaatigaa, kikkut tamarmik taamatut pissusilersunngimmata, arnat mattuttut, palasit ilinniartitsisullu ilaat pitsaasumik pissusilersortartut eqqaamaniarpaa.
Qanormi ililluni ukiuni sisamani taamatut naalliutsinneqarnini anigorsinnaasimavaa? Piitaq Irniq oqaluttuarpoq, angummi puisinniaqatigisaraani. Angutaata uneqqissaarluni puisimik utaqqinissamik ilinniartippaa, - tassami puisimik utaqqigaanni utaqqineq akilersinnaajuaannarpoq, angutaa oqartarpoq. Taamaalilluni Peter Irnerup naammagittarneq ilinniarpaa, oqarlunilu naggueqatigiinnut Inunnut ilaanini nukittoqqutigisimallugu. Tassami naggueqatigiit Inuit nunarsuatsinni inuiannit tamanit naammagittarnerpaapput, oqarpoq.
Nunavummi kommissæriunermi saniatigut Nordvesterritoriami ministeriusimavoq, Nunavummi ministerimut tulliusimalluni, ataqqinaatitut universitetimit doktoritut ataqqinaaserneqarsimalluni maannalu Inuit kulturiat oqaluttuaralugu nunani tamalaani angalasarluni. Taamaalilluni erseqqissarpaa, Inuit kulturiata, inooriaasiatalu angajoqqaaminit ilikkakkami nukissamik tunisaraani piumassuseqalerseqqittarlunilu.
Canadami ministeriuneq utoqqatsermat saniani tusarnaartillugu meeraanini qamuuna misigeqqippaa naggueqatigiinnullu Inunnut ilaaneq qanoq isumaqartoq eqqarsaatigalugu. Naalliutsitaanerminit ukiut 45-t qaangiuttut qamuuna eqqissivoq, siullerpaamillu Canadamiutut akuerineqartutut misigaluni.
