Meeqqerivitsialak caféseminarissutigalugu

Meeqqerivitsialammut atatillugu marlunngorpamiit sisamanngorpat tungaanut caféseminarimik taallugu Sisimiuni Ilulissani Qasigiannguanilu paasiniaaqatigiittoqarnissaani inuit 250-t peqataanissaannut qaaqquneqarsimapput.

Aggersarneqarsimasut meeqqerivinni sulisuupput angajoqqaat sinniisaallutik, ilinniartitsisuullutik kiisalu illoqarfimmi nunaqarfimmiluunniit qinikkatut politikkeriullutik, taamatuttaaq atorfilittaallutik peqatigiiffinneersuullutilluunniit meeqqeriviit ineriartortinnissaannut soqutiginnittuusut. Taakku paasiniaaqatigiinnissaannut siunertarineqarpoq Meeqqerivitsialaap ineriartortinnissaanut takorluukkaminnik pilersaarutiminnillu saqqummiussuitinneqarnissaat.

Maniitsumi assingusumik caféseminareqarneranik misilittakkat takutippaat innuttaasut politikerillu qulequttap tamatuma pingaaruteqartuuneranik isumaqarfigigaat taamalu ineriartortikkusukkaat, suliniummut aqutsisoq Agga Lund taama oqarpoq. Nangipporlu:

- Malugaarputtaaq tamanna Sisimiuni, Ilulissani kiisalu Qasigiannguani assut soqutigineqartoq, taamaattumik illoqarfinni taakkunannga pingasuni qanoq oqaasissaqartoqarnersoq tusarusupparput, Agga Lund oqarpoq.

2007-p ingerlanerani sinerissap ilaani assigiinngitsuni arlalinni caféseminarit ingerlanneqartarumaartut aamma oqaatigineqarpoq.

Meeqqerivitsialak Namminersornerullutik Oqartussat ataani Ilinniartitaanermi pisortaqarfiup piviusunngortinnissaa ineriartortitaraa.