”Meeqqerivitsialammik” Naalakkersuisut pilersitsiniarnerat Ilulissani sapaatip akunnerata naanerani alloriarfigineqarpoq.
”Meeqqerivitsialammik” aallartisaaniarneq oqaatsip taassuma suussusersiniarneranik aallarniisussanut ataatsimeersuarsitsineruvoq. Ineriartortitsineq, meeqqerivinni meeqqanik ukioqanngitsuniit arfinilinnut ukiulinnik, ineriartortitsinermik ilinniartitsinermillu sammisaqarfiuvoq.
Sulinermut tamatumunnga 6 millioni koruuninik ukiuni tulliuttuni pingasuni aningaasaliisoqarpoq, Ilinniartitaanermullu Naalakkersuisoq, Doris Jakobsen, isumaqarpoq, Meeqqerivitsialanngortitsinissamut ingerlatanullu meeqqerivinni sulisunut meeqqanullu iluaqutaasussanut arlalinnut taamaalilluni aningaasassaqassasoq.
Meeqqerivinniit atuarfinnut ikaarsaartarneq, kingusinnerusukkullu ilinniagaqalernissamut ataqatigiissaarinissaq, ”Meeqqerivitsialammik” suliniuteqarnermi Naalakkersuisut anguniarpaat.
- Ulluunerani paaqqinnittarfeqarneq, nunani amerlanerusuni uatsinnut nalinginnaasumik sanilliuttakkatsinni, ilinniartitaanikkut ingerlatsineq tunngavigalugu ullumikkut isigineqartarpoq. Taamaaliornikkut atualernissamut piareersarnerit ilisimatusarfimmut ataqatigiissitsilluta ilinniartitaanermik tamarmiusumik eqqarsarsinnaanngorpugut, Ilinniartitaanermut Naalakkersuisoq, Doris Jakobsen oqarpoq.