Meeqqerivimmiunik qunutitsisoq

Nuummi sapaatip akunnerata naanerani meeqqat paaqqinnittarfimmiut sulisutillu pisuttuartillutik angummit 48-nik ukiulimmit savimmik iffiamut kitserummik qunusaarneqarput. Tamanna pivoq angutip ineqarfigisaata eqqannguani.
februaarip 18-at 2008 09:53

Angut Nuup eqqartuussiviani sassartinneqarami sapaatit akunnerini marlunni Dronning Ingridip Napparsimmavissuani tarnimikkut nappaateqartut immikkoortaqarfianni tigummigallagassanngortinneqarpoq.

Pisup saniatigut inuusuttuaqqat marluk 14-inik 17-inillu ukiullit biilinik aallarussiniartut angumerineqarput.

Illoqarfimmili inuusuttuaqqat allat sisamat, aquttoq 16-inik ukioqartoq, tigusarineqarpoq, ilaasuilu niviarsiaqqat pingasut aqqaneq-marlunnik ukioqartut angajoqqaavinut angerlaanneqarlutik.

Nuummi angerlarsimaffinni eqqissiviilliornerit aqqanillit nalunaarutigineqarput, aalakoorpallaartut arfineq marluk, illoqarfimmilu eqqissiviilliornerit sisamat nalunaarutigineqarlutik.

Katillugit inuit qulit isertitsivimmiitinneqarput.

Sineriammi inuit eqqissisimaarsimaqisut politiit oqaatigaat.