Meeqqerivik Soralumi ikuallattoornissamut sungiusarnikuusimanngillat
Meeqqerivimmi angajoqqaanut ataatsimiisitsisoqaqqammerpoq, sungiusarnerlu ataaseq 10.000 koruuninik akeqarmat meeqqeriviup akissaqarfigisimanngikkaa angajoqqaat nassuiaanneqarsimapput.
Sungiusarnerilli ulluinnarni aqutsinermut tunngammata meeqqeriviup ingerlannissai isumagisariaqarai uanilu kukkusoqarsimasoq Kommuneqarfik Sermersuumi Meeqqanut Inuusuttunullu Ingerlatsivimmi pisortaq Søren Valbak Radioaviisimut ilisimatitsivoq.
- Angajoqqaat piumassuseqarluarlutik suleqataanerat kusanarpoq, angajoqqaanulli ilisimatitsisimaneq kukkuneruvoq. Meeqqerivinni sillimaniarnissamut tunngasut tamarmik ulluinnarni aqutsinermut tunngasuupput aningaasaliissutinullu ilaareerlutik, Søren Valbak nassuiaavoq.
Sungiusarnerit ulluinnarni aqutsinermut tunngasuunerannik Soralumi aqutsisut ilisimasaqarsimannginnerat kommuunip meeqqeriviullu akornanni oqaloqatigiinnerup amigarsimaneranik peqquteqartoq kukkusoqarsimasorlu Søren Valbak oqarpoq. Tamannalu iluarsiniarlugu iliuuseqarnialerput.
- Sillimaniarnermut aamma ikiueqqaarnermut tunngasut tamarmik maleruagassat malillugit ingerlanneqartarnissaat qulakkeerniartariaqarparput, angajoqqaat meeqqerivinnut akiliutaannut tamakku ilaareerput meeqqerivinnullu aningaasaliissutinut ilaareerlutik. Meeqqerivinnut tamanut tamanna aamma ilisimatitsissutigineqassaaq, Søren Valbak erseqqissaavoq.
