Meeqqat – ulloq manna ulloraarsi!
Ukiut kingulliit Meeqqat Ulluata pingaartinneqarnera annertusiartorpoq. Ulloq taanna suliffeqarfiit pisiniarfiillu aaqqissuussisarput, najukkanilu meeqqanut sammitinneqartartut amerlasuut ingerlanneqartarlutik, MIO - Meeqqat Inuusuttullu Oqaloqatigiinnittarfiat tusagassiorfinnut nalunaaruteqarluni taama allappoq.
Nuummi Katuaq ammassaaq, tassani meeqqat klovni Benny Schumann & Henrik Katuaq-p silarliani isiginnaartitsisut takusinnaavaat. Peqatigitillugu MIO najuutissaaq atortussianillu assigiinngitsunik agguaassissalluni.
Ulloq taanna INUA – Kalaallit Røde Korsiat blok P-p inissisimaffiginikuusaani ’Nuuk Playground’-imiissaaq, tassanilu nal. 12 BMZ-ertarfissap sananissaanut issorsiut siulleq assallanneqassaaq. “Nuummi inuusuttut timiminnik aalatitsinissaminnut inissaasuapput. Taamaattumik piffiup Blok P-p inissisimaffiginikuusaata atorluarsinnaanera nuannaarutigaarput. Inissisimaffiup Nuummi meeqqanut inuusuttunullu atorneqarsinnaanera tupinnaannartumik pitsaasuuvoq. BMX-ertarfiup meeqqanit nuannineqarluarnissaa qularinginngilluinnarparput” inuusuttut pillugit siunnersorti Elisa Leth INUA-meersoq oqarpoq.
Maniitsumi NAKUUSA ulloq taanna aaqqissuussinissanik assigiinngitsunik pilersaaruteqarpoq. Nalliuttorsiualaarnerit timersortarfimmi ingerlanneqassapput. MIO aamma Peqatigiiffik Kalaallit Meerartaat/Forneningen Grønlandske Børn aamma timersortarfimmi najuutissapput, tassanilu atortussianik assigiinngitsunik agguaassissallutik. Maniitsumi nalliuttorsiualaarnerit 2. Juni nanginneqassapput, tassani MIO’p nal. 13-15 orienteringsløb - MIO-mit, RAL-imit piumassutsiminnillu suleqataasut akornanni suleqatigiinnikkut ingerlanneqartoq - oqaluffitoqqamiit aallartittussaq ingerlatissavaa.
- Meeqqat Ulluat nalliussivarput, kisiannili ukiup ingerlanerani ullut tamaasa meeqqatsinnik isumassuinissarput puijussanngilarput. Oqaatigineqartuartarpoq ‘Meeqqat siunissaraagut’. Tamatuminnga tamatta eqqaamanneqatigiitta, qanorlu nukituujullutik Kalaallit Nunaani siunissaanissaminnut piareernissaasa eqqanaarnissaa pillugu immitsinnut aperaluta” Meeqqat Illersuisuat Aaja Chemnitz Larsen attaveqatigiittartut sinnerlugit oqarpoq, nangillunilu:
- Angajoqqaat tamaasa ulloq taanna meeqqamik siunissami sinnattui aamma kissaatigisaat pillugit oqaloqatiginninnermut atuinissaannik kaammattorumavagut.
Aaja Chemnitz naggasiilluni MIO-miit, NAKUUSA-miit, INUA – Kalaallit Røde Korsiannit, Red Barnet Nuummit, Peqatigiiffik Kalaallit Meerartaannit/Foreningen Grønlandske Børn-imit, Nanu Børn-imit, Meeqqat Inuunerissunit/Bedre Børneliv-imit aamma Inooqammit Kalaallit Nunaanni meeqqat tamaasa Meeqqat Ulluanni pilluaqquai.
