Meeqqat utaqqisinneqartarnerat akuersaarnartinngilaat
- ”Tassa meeqqanik inissiivissaarutivilluta inissiivissaaruttaratta allaat sulisutut imminut pilliutiginiartarluta naggataatigut.”
”Sunaana ilissi eqimattassinni oqariartuutiginiarissi naammagisinnaajunnaarlugu?
- "Tassa meeqqat utaqqisoqarnerat inissiiviit ulloq unnuarlu paaqqinnittarfiit amigaatigineqarmata taanna naammagisinnaajunnaaripput tungittinninngaaniit.”
Taamatut oqarpoq inunnik sullissisoq Rosa Bidstrup. Nunatsinnilu qitiusumik utaqqisut allattortarfianni allassimasut malillugit meeqqat qulinngiluat angerlarsimaffimmik avataannut inissinneqarnissaminnut amigaateqarput.
Utaqqisulli allattorsimaffiat kisimi ajornartorsiutaanngilaq aammali angerlarsimaffimmut sumut inissiffissamut tulluunnersut paasiniaaffissamik angerlarsimaffimmik peqartoqartariaqartoq Rosa Bidstrup aamma oqarpoq:
”aallaqqaammut inissiiniaraanni tulluartumut meeqqamut taanna pilersinneqartuuppat observationshjemmeq taava tassanngaaniit nalilersorneqartassagaluarpoq meeraq taanna sumut ingerlateqqinniaripput.”
Peqqinnissamut Ilaqutariinnermullu naalakkersuisoq Arkalo Abelsen oqarpoq taanna ilumut amigaataasoq. Massakkullu paasissutissat katersornerarpaat paasisat aallaavigalugit angerlarsimaffiit suut amigaatigineqarnersut nalunaarsorniarlugit, taakkualu ukiaru inatsisartut ataatsimiittinnagit naammassineqarsimanissaat naatsorsuutiginerarpaa.
Qaqugorpiarlu piviusunngussanersoq apeqqutigigatsigu ima akivoq:
”Taava inatsisartunut saqqimmiukkumaarpakka aajukua angerlarsimaffiit imaattut imaattullu pisariaqartinneqartut taakkua tulleriiaartariaqarpagut aningaasanut inatsisit aqqutigalugu.”
