Meeqqat unatarnissaat kiisami inerteqqutinngulerpoq
Meeqqanik unataasinnaatitaaneq pillugu suli inerteqquteqarani Kalaallit Nunaat Nunani avannarlerni kingullersaavoq.
Tamannali qaangiuttussanngorpoq.
Taama pisoqassaaq politikerit upernaaq manna ataatsimiinnerminni meeqqanik timikkut tarnikkullu naalliutitsineq, tassa meeqqanik unataasinnaatitaaneq atorunnaarsippassuk.
Inerteqqutinngornissaa piffissanngorsimavoq
Tamatuma inerteqqutinngornissaa piffissanngorsimasoq, Kalaallit Nunaanni inuttut pisinnaatitaaffiit pillugit siunnersuisoqatigiit siulittaasorigallagaat Inge Olsvig Brandt isumaqarpoq.
- Kalaallit Nunaanni inuttut pisinnaatitaaffiit pillugit siunnersuisoqatigiinni isumaqarpugut taama nalunaarneq pingaaruteqartoq, meeqqanut nakuuserneq sunaluunniit akuerineqarsinnaanngimmat. Meeqqat tamarmik inuunerissuusinnaasariaqarput, taamaattumik assorsuaq nuannaarpugut Inatsisartut ataatsimiinnissaanni tamanna qaqinniarneqarmat.
Meeqqat qassit nakuuserfigineqartarnersut ullumikkut ilisimaneqanngilaq. Inge Olsvig Brandt naapertorlugu inatsimmik allannguiniarneq ersarissumik nalunaarneruvoq:
- Nakuusertarnerup inerteqqutaaneranik kalerrisaarutaavoq. Nakuuserneq nakuuserneruvoq, naveersinikkut, isumaqaruilluunniit meeqqat unartartarlugu perorsarsinnaallugu, aamma tamanna nakuuserneruvoq.
FN-ip meeqqat pillugit aalajangersagaannut qanippoq
Allannguutissaq Naalagaaffiit Peqatigiit meeqqat pillugit aalajangersagaanut qanippoq. Nunatsinni inuttut piginnaatitaaffiit pillugit siunnersuisoqatigiinni aamma isumaqarput, timikkut tarnikkullu naalliutsitsisinnaanerup atorunnaarsinneqarneratigut inuiaqatigiinni nakuusernermut akiuiniarnermut aamma nukittorsaataassasoq.
- Nakuusernerit pillugit kisitsisit nunatsinni annertoorujussuupput, naak pinerluttulerinermi inatsiseqaraluarluta. Pingaaruteqarpoq assigiinngitsunik suliallit tamakku akiorniarlugit pinaveersaartitsinermik suliaqartinnissaat, nakuusertarnerlu pillugu paasititsiniaasoqarluni, Inge Olsvig Brandt oqarpoq.
Danmarkimi meeqqanik unataaneq 1997-imi inerteqqutinngortinneqarpoq.
Inatsisissaq Inatsiartut akuerissappassuk, timikkut tarnikkullu naalliutitsineq januaarip aallaqqaataani 2016-miit inerteqqutaalissaaq.
