Meeqqat ulloq unnuarlu angerlarsimaffiini najugallit kingumut poortugarsissapput
Nuummi meeqqat ulloq unnuarlu angerlarsimaffiini najugaqartunut meeqqanut, innuttaasut juullimi poortukkanik tunissuteqarnissaannik isumassarsisoqarpoq.
Isumassarsisoq aterminik taaserusunngitsoq radioaviisimut oqarpoq meeqqat angerlarsimaffianni najugaqartunut meeqqanut juullimut tunissutissanik katersinertik siulleq siorna pisimasoq, taamanilu poortukkat 300-it katersorneqarsimasut.
Ukioq manna meeqqanut poortugassanik katersineq siornatulli tunissuteqarfigineqarpallaanngimmat poortugarsititsisarnissamik siunnersuuteqartoq oqarpoq innuttaasut siornatulli piumassuseqarluarlutik ukioq manna tunissuteqaqqinnissaat kissaatiginaraluartoq.
Meeqqanut ulloq unnuarlu inissiisarfimmiittunut poortugarsititsinissamik isumassarsisup aqqi isertuukkusuppaa isumaqarami juullimi meeqqat qitiusariaqartut.
- Meerartatta pisariaqartitaanik isumassarsiaq isiginnaaginnarata tamatta iliuuseqarsinnaanitsinnik tunngaveqarpoq, kommuneqarfitsinilumi meerartatta atugaannut tamatta akisussaaqataavugut. Taamaattumik sinerissami kommuneqarfiit allat aamma taama iliortoqartarnissaannik siunnersuuteqarfigerusuppakka, porrtugarsititsisarnissamik isumassarsisoq oqarpoq.
Nuummi meeqqat angerlarsimaffianni najugaqartunut poortugarsititsinissamik isumassarsisup tikkuarpaa meeqqat angerlarsimaffianniittut juullimi ilaquttaminnit poortugarsinngitsoortartut juullip kingorna atualeqqinnermi misigisartagaat, tassalu meeraqatit juullimi poortugarsiaminik takutissuinerinut isiginnaaginnartarneq, isumassarsiamut tunngavioqataasoq.
Nuummi Sct. Georgs Gilde meeqqanut ulloq unnuarlu inissiisarfimmiittunut juullimi poortugarsiassaannik tuniserusuttut tunissutaannik tigooqqaasuussaaq, tuniserusuttullu Skt. Georgs Gildemi Ingrid Petersen-imut imaluunniit Sanne Mikkelsen-imut saaffiginnissinnaapput.
