Meeqqat ukiukitsut AWG-tassanngikkaluarput
- Siunissami Nunatsinni timersortartuuneq iluamik ingerlanneqassappat taava meeqqat aqqaneq marlunnik ukiullit AWG-mut peqataatinneqartarneri taamaatinneqartariaqarpoq, tassami siusippallaarujussuarpoq meeqqat taama ukiukitsigut taama pingaaruteqartigisumut peqataatinneqartarneri, Kim Godtfredsen oqarpoq.
Meeqqat unammiartortut annertuupilussuarmik piumaffigineqartarneri meeqqanut taama ukiukitsigisunut artornarsinnaasartoq, Kim Godtfredsen oqarpoq imalu nangilluni.
- Taama annertutigisumi unammereernermi meeqqat piumassuseeruttarput, tassami misigisarpaat ajorsarujussuarenrit, taamaalillutillu timersornermik aallussinissartik soqutigunnaartarlugu.
Kim Godtfredsenip kingumut qiviarluni Arctic Winter Games 2004-mi pisoq assersuutigaa, oqarluni sisoraatinik oqilaniunnermi taamani peqataasunit 24-usunit, sisamannaat ullumikkut sisoraatinik oqilaniunneq suli ingerlammassuk.
- Meeqqat inersimasunngorneranni timersortarnissaat qulakkiissagaanni, meeqqat taama ukiukitsigisut unammiartortittarnissaat mianersuunneqartariaqarpoq. Tassami maanna ilisimasarput tassaavoq, soorlu 2004-mi unammiartortitatta 24-isut akornanni, taamaallaat sisamaannaat ullumikkkut timersornermik aallutaqarput.
Meeqqat ukiuttut illersorneqarnissaat pingaartinneqarnerusariaqartoq, Kim Godtfredsen isumaqarpoq.
- Meeqqat illersorneqartariaqarput, ilaatigut naqqaniit aallartittumik sungiusartarlugit. Tamanna Timersoqatigiit Kattuffiannit eqqumaffigineqartariaqarpoq aamma minnerunngitsumik Nunatsinni politikerinit tamanna eqqumaffigineqartariaqarluni. Tassami siunissami timersdornermik soqutigisaqartut amersinneqassappata akisussaasut suliaqartariaqarput, Kim Godtfredsen oqarpoq
Nuummi Arctic Winter Games-eqartussaavoq 2016-imi, aningaasallu ikinnerpaamik 44,6 million koruunit tamatumunnga atugassaajumaartut naatsorsuutigineqarluni.
