Meeqqat sumiginnakkat amerliartuinnarput
Nuummi meeqqanik sumiginnaaneq ajornartorsiutaaleraluttuinnartoq, misissuinerup nutaap inernerata takutikkaa, Danmarkimi aviisimi Kristeligt Dagbladimi allaaserineqarpoq.
Tarnip pissusaanik ilisimasalik Kirsten Ørgaard Kalaallit Nunaanni Sulisitsisut Peqatigiiffianni atorfilik misissuisuusimavoq, taassumalu politiit ukiuni marlunni ulloq unnuarlu nalunaarutaat misissorsimavai.
Meeqqat politiinut attaveqartartut ukioq 2002-mit 2003-mut 41 %-imik amerlisimapput. Taamatuttaaq niviarsiaqqat kinguaassiutitigut atornerlunneqarsimasut marloriaammik amerlanerulersimallutik.
- Ernumanartoqarpoq aamma kisitsisit ilimagisatsinnit qaffasinnerupput. Kirsten Ørgaard oqarpoq.
Misissuinerup takutippaa, meeqqat angajoqqaavisa imerneranni unnuaannakkut angalaartartut. Meeqqat annersarneqartarput, kinguaassiutitigut atornerlunneqartarlutik, angajoqqaat eqqissiviilliortitsineranni isiginnittuusarput, meeqqallu arfinilinnik ukiullit aamma tillinniartarlutik.
