Meeqqat sumiginnakkat akerliussutsimik takutitsissutaapput
Meeqqat sumiginnakkat, kinguaassiutitigullu atornerluinerit, tamakkuupput Inatsisartuni ullumi oqaluuserineqartut.
Akerliussutsimik takutitsisut ilaatigut ima oqaaseqarput:
- Asasavut Naalakkersuisut, ulloq ataaseq misiliilaaritsi Nuup illoqarfiata qeqqani unnukkut aqqarngup missaani alakkaallusi. Tassani takussaapput atuarfiup Ukaliusap akinnguani meerarpassuit minnerniit annerumaanut - takussavasi meeqqat unnussuarmut nuannikkisaartut. Imaassinnaavoq taakku meeqqat angerlarsimaffimminniit immaffiusuniit imaluunniit ikiaroorfiusuniit qimarngusut, angajoqqaaminnit piffissaqarfigineqanngitsut. Aamma imaassinnaavoq taakku meeqqat atornerlunneqarnerminnit annersagaanerminniilluunniit qimarngusut, Perorsaasut Ilinniarsimasut Peqatigiiffianniit Naasunnguaq Bisgaard akerliussutsimik takutitsinermi ilaatigut taama oqarpoq.
Inatsisartut ullumi oqaluuserisaat meeqqat sumiginnarneqartarnerinut ilaatigut tunngassuteqartiterput.
Demokraatit ajornartorsiummik tamatuminnga qaqitsinerminni ajornartorsiutip nipangiusimaneqarpallaarnera erseqqissaatigaat.
Assersuutitullu Savalimmiut Danmarkilu kisitsisit taakkartornerisigut imaattumik sanilliussipput; Danmarkimi inuit 10.000-t pineqarpata, kinguaassiutitigut atornerluisimasutut unnerluutigineqartut 4,74. Savalimmiuni inuit 10.000-t pineqarpata tallimat unnerluutigineqartarput, nunatsinnili inuit 10.000-t pineqarpata taava 72-t unnerluutigineqartarlutik. Demokraatillu siunnersuutigaat, ilaqutariit iluanni kinguaassiutitigut atornerluisarnermut akiuiniarluni suliniutit qanoq pataajaallisarneqarsinnaanerat.
Ilaqutariinnermulli naalakkersuisup, Aleqa Hammondip, akissuteqarnermini, suliniutaasarsimasut, ilaatigut Paarisap suliniutigisarsimasai, taakkartorpai. Ajornartorsiulli qaangerniarneqassappat iliuuserineqartartut suli naammannginnerat erseqqissaatigaa.
Taanna ima oqarpoq:
- Kinguaassiutitigut atornerluisut namminneerlutik aamma atornerlunneqarsimasuusarput, taakkulu aamma ikiorneqartariaqarput, meeqqanut sumiginnaaneq unitsinneqassappat.
