Meeqqat suliffimmi avatangiisaat aamma pitsaasuusariaqarput
- Suliffimmi isumannaallisaanikkut pissutsinik misissuisoqaraangat inersimasut kisimik apersorneqartarput. Meeqqalli aamma isummersinnaapput, ulluinnarnilu ornittakkatik pillugit ilisimasaqartuullutik, Aaja Chemnitz Larsen oqarpoq.
Meeqqat suliffimmi avatangiisaat sumiiffippassuarni ajuipput. Atuarfippassuit nungullarsimapput, asbestimillu atuilluni sanaartortoqartarallarneraniilli sanaajullutik. Atuarfiit, kollegiat skolehjemillu nungullarsimangaaramik, imaluunniit aserfallatsaalineqarsimanngingaaramik, igalaavi matuneqarsinnaanngillalluunniit, aamma oqoqarput, silaannaloqalutillu.
Taamaammat meeqqat suliffimmi avatangiisaat Meeqqat Inuusuttullu Oqaloqatiginnittarfiata, MIO-p, maanna suliniuteqarfiginialerpaa, atuarfinni meeqqerivinnilu avatangiisiminnit qanoq sunnerneqartarnersut, qanorlu misigisaqartarnersut, misissuiffigalugit, Aaja Chemnitz Larsen oqarpoq.
Atuarfiit, kollegiat skolehjemillu misissuiffiginerisa saniatigut, nipiliorneq qinngasaarisarnerlu pingaartillugit aamma sammineqassapput.
- Meeqqat ilaatinnissaat tusaaniarnissaallu uagut inersimasutut akisussaaffigaarput, Naalagaaffiit Peqatigiit meeqqat pillugit isumaqatigiissutaanni tamanna aalajangerneqareerpoq, pingaaruteqarnerpaanullu ilaalluni, Meeqqat illersuisuat oqaaseqartartuallu erseqqissaavoq.