Meeqqat siutimikkut sooq maqisoortarnersut ilisimatusaatigineqalerpoq
Siutikkut maqisoornermik nappaateqarneq, nunarsuarmiioqatitsinnut allanut naleqqiullugu, Kalaallit Nunaanni meeqqat akornanni ajornartorsiutaanerpaajugunarpoq. Maqisoortarnerlu assigiinngitsunik kinguneqapilutsinneqartarpoq. Rigshospitalemi nakorsaq, Ramon Gordon Jensen, taamaa oqarpoq. Kalaallit Nunaanni meeqqat siutikkut maqisoortarnerat pillugu taanna ph.d.-nngorniuteqarpoq.
- Kalaallit Nunaanni meeqqat 12 procentiisa 14 procentiisalu akornanni nappaataasoq ilisimavarput, tassalu nunarsuarmi qaffasinnerpaanut ilaavoq.
Naalagaaffiit Peqatigiit peqqinnissakkut suliniaqatigiiffiata, WHO-p, nunani assigiinngitsuni meeqqat akornanni siutimikkut maqisoortarnerata ajornartorsiutinngortarnera 4 procentimut killigitippaa. Kisitsillu taanna qaangerneqarpat ajornartorsiutitut annertuutut isigineqassalluni. Kalaallit meerartaasa akornanni siutimikkut maqisoortartut 14 procent angusimalerpaa. kisitsillu taanna annertuvallaarpoq, Ramon Gordon Jensen oqarpoq. Angerlarsimaffinni pujortarpallaarneq pisooqataasunut ilaavoq.
- Angerlarsimaffinni pujortarfiusut meerataat siutimikkut maqisoorneq nappaatigikkajunnerugaat ilisimalikkatsinnut ilaavoq. Aammalu angerlarsimaffinni eqqiluisaanngippallaarnerup kinguneranik maqisoorneq nappaatigikkajunneqartoq ilisimavarput.
Siutikkut maqisoortarnerup kingunipilui annertupput. Ilaatigummi meeqqat ilikkagaqarsinnaanerat annikinnerulersarpoq - aamma pisunut malinnaasinnaanerat innarlerneqartarpoq.
- Meeqqat siutimikkut maqisuukulasut akornannim, angerlarsimaffinni oqaatsit atugaasut ilikkarniarneri kingusittarpoq, aammalu oqalunnerat arriinnerusarluni. Atualeraagamillu ilikkarumaataarnerusarlutik, nakorsaq Ramon Gordon Jensen oqarpoq.
Meeqqat siutimikkut maqisoortarnerat pinngitsoortinniaraanni, meeqqat mikinerannit nakorsamut misissortikulanerusariaqartut nakorsap Ramon Gordon Jensenip innersuussutigaa.
