Meeqqat sisamat Kapisilinniillutik perorsaasuminnit qimaagarluarput

Meeqqat sisamat aqqanilinnit 13-it tikilllugit ukiullit, Nuummi meeqqat angerlarsimaffianni najugaqartinneqartut, Kapisilinni tammaarsimaartinneqartillutik, najugaqarfigisaminnit nunamut sapaatiummat qimaapput, tamatumalu kingorna Kapisilinni kommunefogedemit perorsaasunillu ujarneqartariaqarlutik.
Allattoq Jaaku Lyberth
aggustip 17-at 2009 09:32

Meeqqat kommunefogedemit perorsaasunillu sapaatiummat ualikkut nassaarineqarput, nassaarineqarnerminnilu meeqqat marluk savimmik imminnut toqunniarlutik sioorasaaripput. Pisoq pillugu Nuummi politiit kalerrinneqarput, erngertumillu, angallat sukkasuuliaq angallatigalugu, Nuummi politiit qatserisartullu Kapisilinnukarput.

Politiit qatserisartullu Kapisilinnut apuunneranni, meeqqat kommunefogedemit perorsaasunillu nakkutigineqarput, tamatumalu kingorna meeqqat politiinit Nuummukaanneqarput, Nuummi politeeqarfimmi pigaartut oqaluttuarput.