Meeqqat salliutinneqarput
FN-ip avatangiisinut ullorititaani nunarsuarmit tamanit nunarput maluginiarneqarpoq. Annerusumik silaannaap allanngoriartorneranut atatillugu oqallinnerit ingerlapput. Silaannaap allanngoriartornera aamma nunatsinni eqqartorneqarluartartut ilagaat. Illu A21 Narsamiittoq, kulturimut avatangiisinullu illu, ullaaq manna nalliuttorsiutigineqarpoq. Taama oqarpoq attaveqaataasoq, katersugaasivimmi pisortaq Rie Oldenburg.:
- Meeqqat sunnerniassallugit ajornannginnerusarmarta taakkua siulliuppagut. Meeqqat atuartut mikinerit ilinniartitsisuilu 75-it missaanniittut aggersarsimavagut. Paasisitsiniutitut oqariartuutigaarput, pisortat kisimik pinnatik avatangiisinut akisussaaffik tamatta pigigatsigu. Tassa avatangiisit eqqarsaatigisariaqarpagut, aammalu immitsinnut paarisariaqarluta. Timigissartarnissap pingaarutaa aamma takutinniarparput, tassami timigissartarnerup aammalu qasuersaartarnissap pingaarutai tamatta nalunngittariaqarparput, taamaattaruttami nunarsuarmi naapitassat nukissaqarfiginerussagatsigit. Aamma meeqqat imminnut nerisassiuutissapput, Rie Oldenburg oqarpoq.
Narsami kultoorikkut avatangiisinullu illoritinneqartoq taaguuteqarpoq A21. Taamatut ateqartinneqarpoq, takutinniarlugu Agenda 21-i pillugu illumi suliniartoqarnera. Taassuma imaraa, nungusaataanngitsumik pinngortitamik atuineq. Aamma meeqqat atuartut tamarmik naasumik morgenfrue-mik taaneqartartumik klassii tuniorarneqarput, meeqqallu taakkua naasoq taanna paarilluarniarsarissavaat. Aamma naasoq taanna nunarsuaq tamakkerlugu, atuartunit sammineqartussaavoq, tassanilu illu A-21 aamma peqataasussaavoq. Ilaatigut Berlinimi Tysklandimit aammalu Capetown-imit sydafrikamit naasulerinermi peqataaffigineqassaaq.
Tamannalu pillugu Rie Oldenburg ima oqarpoq:
- Internet-i aqqutigalugu atuartut imminnut attaveqaqatigiittassapput, ilaatigut paasisaminnik tunioraaqatigiittassallutik. Tassa A21-imi pingaartipparput, illoqarfigisaq kisiat pinnagu, kisianni aamma nunarsuaq tamaat eqqarsaatigalugu suliniaqataasarnissaq. Imaassinnaavoq aamma naatitsivimmik pilersitsinissamut aningaasanik pissarsisugut.
Narsami katersugaasiviup pisortaa Rie Oldenborg, taama oqarpoq.
Nunarsuaq tamakkerlugu avatangiisit pinnngortitarlu pillugit ulloritinneqartumi, Avatangiisit pinngortitarlu pillugit naalakkersuisoq, Ark'alo Abelsen, Tromsømi Norgemiittumi nalliuttorsioriaqataavoq. Tassani eqqartorneqartussaapput silaannaap allanngoriartornera, sikullu aakkiartuinnarnera.
