Meeqqat quliugaangata ataatsip TB pigisarpaa

Kalaallit meeqqat quliugaangata ataatsip sakialluut tuniluuttartoq pigisaraa Rigshospitalimi nakorsaanerup Åse Bengård Andersenip misissueqqammernerata takutippaa. Taanna naappaatit tuniluuttartut sapaatip akunnerata naanerani Nuummi isumasioqatigiiffigineqarmata najuuppoq.

Åse Bengård Andersenip nuannaarutiginerarpaa 2012-p tungaanut sakialluutip akiornissaa Namminersornerullutik Oqartussanit pilersaarusiuunneqareersimammat.

- Tupigusuallaatiginngitsuunngilara taama sukkatigisumik iliuuseqartoqarsinnaasimammat aammalu sukumiilluinnartumik ajornartorsiut oqallisigineqareersimammat, Åse Bengård Andersen oqarpoq nangipporlu:

- Ajunngitsup tungaanut aallartoqartoq takusinnavara, ilisimassavarpulli ajornartorsiut imaannaanngitsuummat taamaammallu ullormiit ullormut mumisinneqarsinnaanani.

Åse Bengård Andersenip erseqqissarpaa sakialluttut ikiliseqqinnissaannut ukiut arlallit atortariaqarmata.

- Oqaluttuarisaanerup takutereerpaa kalaallit inuiaqatigiit sakialluut ajungaaffigisinnaagaat, taamaammat qularinngilara aamma massakkut sakialluut ajungaaffigineqaqqikkumaartoq, Åse Bengård Andersen oqarpoq. Taanna nangilluni oqarpoq ukiorpaaluit kingulliit sakialluut nunguvissoralugu Kalaallit Nunaanni peqqinnissaqarfiup nappaaterpassuit allat pingaarnerutillugit akiorniarsimagai.

– Alallatsiarneqarnermini sakialluut sakkortusereerluni uteqqippoq, qularinngilarali nungusarneqarumaartoq, Åse Bengård Andersen oqarpoq nangipporlu:

- Nunani allani tamanna naluneqanngilaq, Kalaallit Nunaannili piareersimalluarput sulisummi amerlineqareerput qaammarsaanerlu allartinneqareerluni.

Sapaatip akunnerata naanerani nappaatit tuniluuttartut pillugit isumasioqatigiinneq kalaallinut danskinullu iluaqusiisimassaqisoq Åse Bengård Andersenip aamma qularutiginnginnerarpaa.